Metro պարբերական. Հայ մասնակցի երգն ունի եզրափակիչ անցնելու բոլոր նախադրյալները (ՏԵՍԱՆՅՈՒԹ)

ԵՐԵՎԱՆ, 2 մայիսի. /Նովոստի-Արմենիա/. Metro բրիտանական հայտնի պարբերականը գրել է «Եվրատեսիլ 2017» երգի միջազգային մրցույթի հայաստանյան ներկայացուցչի ելույթի մասին։

«Հայաստանը մեծ քայլ առաջ է կատարել մրցույթի առաջին փորձի օրը»,– ասվում է հոդվածում»։

Նշվում է, որ հայ մասնակցի երգն ունի առաջին ընտրական փուլն անցնելու բոլոր հնարավորությունները։

«Fly with me երգն ունի էթնիկ, ազգային հզոր ռիթմ։ Ժամանակակից պարերի տարրեր ընդգրկող համարի հանդարտ սկիզբը դրամատիկ վերջաբան ունի։ Ֆոնային տեսապատկերը ցուցադրում է ամպերում անհետացող հայկական զարդանախշեր, ինչը ելույթին ազգային կոլորիտ է հաղորդում»,– նշում է պարբերականը։

Հոդվածի հեղինակների կարծիքով, Արծվիկի ելույթը կարող է երկակի զգացումներ առաջացնել, այնուամենայնիվ, հանդիսատեսի մեծ մասին այն դուր կգա։

«Եվրատեսիլ 2017»–ին կմասնակցի 43 երկիր։ Մրցույթի կիսաեզրափակիչը կանցկացվի մայիսի 9–ին և 11–ին, իսկ եզրափակիչը` մայիսի 13–ին։ Հայ մասնակիցը ելույթ կունենա առաջի կիսաեզրափակչում 16–րդ համարի ներքո։ -0-