Հայաստանն առաջարկում է Ծաղկաձորում անցկացնել «Պետերբուրգյան կամուրջներ» փառատոնը

ԵՐԵՎԱՆ, 23 հուլիսի. /Նովոստի–Արմենիա/. «Պետերբուրգյան կամուրջներ» խորագրով փառատոնն առաջարկում են անցկացնել Ծաղկաձորի Գրողների տանը, հաղորդում է «Իզվեստիյա» հրատարակությունը։

Ծաղկաձորների Գրողների տան տնօրեն Մովսես Մանուկյանը նամակ է գրել Սանկտ Պետերբուրգի Գրողների միության նախագահ Վալերի Պոպովին` առաջարկելով Հայաստանում կազմակերպել «Պետերբուրգյան կամուրջներ» խորագրով փառատոնը։

Ավելի վաղ Կոմարովոյի գրողների տան տնօրեն Պյոտոր Ռոմանովը հայտարարել է, որ այսուհետ չի ցանկանում ընդունել ֆորումի մասնակիցներին, քանի որ համարում է, որ բանաստեղծների վարքագիծն անվայել է։

«Առաջարկում ենք կազմակերպիչներին քննարկել հիմնական փառատոնային ընթերցումների ծրագիրը Կոմարովոյից տեղափոխել Ծաղկաձոր, քանի որ Հայաստանի մտավորականությունը կարևորում է աջակցել փառատոնին, որն ունի  մշակութային ավանդույթ», – նշվում է նամակում։

Ռոմանովը բողոքել է, որ փառատոնի ժամանակ «հյուրանոցային համարները, որտեղ բնակվել են մասնակիցները, գտնվել են անմխիթար վիճակում, ծխախոտի ավելցուկները մարել են պատի վրա և մտցրել վարդակը»։

Մանուկյանը «Իզվեստիյա» հրատարակության հետ զրույցի ժամանակ նշել է, որ նրան, ի տարբերություն Կոմարովոյի գործընկերոջը, չեն վախեցնում փառատոնի անցկացման հնարավոր հետևանքները, քանի որ նա 36 տարի զբաղեցնում է Գրողների տան տնօրենի պաշտոնը և «շատ բան է տեսել»։

«Ամենուր հարկավոր է անհատական մոտեցում։ Մենք անգամ պատրաստ ենք տրամադրել հատուկ մարդկանց, ովքեր կհետևեն բանաստեղծներին։ Ինձ համար ավելի կարևոր է, որպեսզի Գրողների տունը մնա վայր գրողների համար։ Երիտասարդ տարիքում ես լսում էի, թե ինչպես էր յուրաքանչյուր սենյակից լսվում  տպագրական մեքենային ձայնը։ Եվ չնայած հիմա տպագրական մեքենաներ այլևս չկան, անձամբ ինձ համար կարևոր է Գրողների տունը լցնել ստեղնաշարի թխկոցով։ Ուզում եմ, որպեսզի գրողները կերտեն այստեղ», – ընդգծել է Մանուկյանը։

«Պետերբուրգյան կամուրջներ» փառատոնի կազմկոմիտեի նախագահ Գալինա Իլյուխինան հետաքրքրվել է առաջարկով` նշելով, որ Հայաստանում կարելի է կազմակերպել փառատոնի այն մասը, որն անցկացվում է աշնանը։

«Իհարկե, Հայաստանը հեռու է, և դժվար կլինի ողջ կազմով գնալ այնտեղ։ Լեհաստանի և Ֆինլանդիայի մեր հյուրերին ավելի հարմար է այցելել Պետերբուրգ, դա արագ է և թանկ չէ։ Սակայն կարելի է գնալ Ծաղկաձոր փոքր պատվիրակությամբ», – ասել է Իլյուխինան։

Կազմակերպիչների խոսքերով` տեղափոխման դեպքում փառատոնը չի փոխի անվանումը։

Սանկտ Պետերբուրգի գրողների միության նախագահ Վալերի Պոպովը հնարավոր է համարում փառատոնի տեղափոխումը։ Նա նշել է, որ կփորձի օգնել հովանավորների հարցում`Հայաստան նախատեսված թռիչքի ծախսերը հոգալու համար։

Ծաղկաձորի գրողների միության տունը հիմնադրվել է 1930 թ.–ին։ Տարբեր տարիներին այստեղ իջևանել են Օսիպ Մանդելշտամը, Վասիլի Գրոսմանը, հայկական գրականության դասականներ Եղիշե Չարենցը, Սիլվա Կապուտիկյանը, Հրանտ Մաթևոսյանը և ուիշներ։–0–