Ջազի միջազգային օրվա կապակցությամբ ապրիլի 30-ին համերգ կկազմակերպվի Երևանում

ԵՐԵՎԱՆ, 29 ապրիլի. /Նովոստի–Արմենիա/. Ապրիլի 30-ին Կասկադ համալիրի հարակից տարածքում տեղի կունենա համերգ՝ նվիրված Ջազի միջազգային օրվան, հայտնում է Երևանի քաղաքապետարանի մամուլի ծառայությունը։

«Երևանի քաղաքապետ Տարոն Մարգարյանի հովանու ներքո մի քանի տարի անընդմեջ ջազի միջազգային և հայ վարպետների ու ջազ-բենդերի մասնակցությամբ Երևանում նշվում է Ջազի միջազգային օրը»,– նշված է հաղորդագրության մեջ:

Համերգի կապակցությամբ Երևան կայցելեն ազգությամբ հայ ջազ երաժիշտներ Մակեդոնիայից՝ Թավիջյան եղբայրները` իրենց տրիոյով:

Համերգին հանդես կգան Գարո և Դիրան Թավիջյանները և Գորան Գեշովսկին, ՀՀ արվեստի վաստակավոր գործիչներ Արմեն Թութունջյանը, Վահագն Հայրապետյանը, Երվանդ Երզնկյանը, Մարտին Վարդազարյանը, Հայաստանի պետական ջազ-նվագախումբը՝ ՀՀ արվեստի վաստակավոր գործիչ Արմեն Հյուսնունցի ղեկավարությամբ, տաղանդավոր երաժիշտ Կարեն Մամիկոնյանը և ուրիշներ:

Թավիջյան եղբայրները Մակեդոնիայում ճանաչված ստացած ջազմեններ են: Նրանք ավելի քան 400 համերգներ են ունեցել Եվրոպայում, ԱՄՆ-ում և Բալկաններում: Թավիջյան եղբայրները Մակեդոնիայում արժանացել են «Մակեդոնիայի երաժշտության դեսպաններ» բարձր կոչմանը, ինչպես նաև բրիտանական SONY JAZZ մրցույթի դափնեկիրներ են:

Նրանք հայտնի են որպես բարձրակարգ կոմպոզիտորներ և պրոդյուսերներ, ովքեր համագործակցել և ելույթ են ունեցել աշխարհահռչակ երաժիշտներ Ջո Զավինուլի, Չիկ Կորեայի, Ռհանի Կրիջանի, Ռոզանա Վիտրոյի, Ռիշար Գալյանոյի հետ:

Թավիջյան ընտանիքը Մակեդոնիայում ամենահայտնի հայկական գերդաստաններից է: Նրանք ցեղասպանության հետևանքով Արևմտյան Հայաստանից տեղահանված և Մակեդոնիայում նոր կյանք սկսած գերդաստանի 4-րդ սերնդի ներկայացուցիչներն են:

Ապրիլի 30-ին ողջ աշխարհում մի շարք համերգներ և միջոցառումներ կանցկացվեն, որոնց նպատակը կլինի ջազի մասին տեղեկություն տարածելն ու ջազը որպես ազատության ինքնատիպ լեզու ճանաչելու գործընթացին աջակցելը։

Ջազի միջազգային օրվա կապակցությամբ Փարիզում նույնպես համերգ կկազմակերպվի, որին համաշխարհային մեծության աստղեր կմասնակցեն։ Համերգը կանցկացվի ՅՈՒՆԵՍԿՕ–ի 70-ամյակի տոնակատարության շրջանակում։-0-