ԵՐԵՎԱՆ, 20 հոկտեմբերի. /Նովոստի-Արմենիա/. Ռուս պրոդյուսեր Տիմուր Բեկմամբետովի և ռեժիսոր Լևան Գաբրիաձեի` Հոլիվուդում նկարահանած «Cybernatural» սարսափ ֆիլմը ԱՄՆ-ի վարձույթում կլինի 2015թ.-ի ապրիլի 10-ին, երկուշաբթի ՌԻԱ Նովոստիին են տեղեկացրել Bazelevz կինոընկերության մամուլի ծառայությունից:
Սարսափ ֆիլմի համաշխարհային պրեմիերան տեղի է ունեցել Կանադայի Մոնրեալ քաղաքում անցկացված «Ֆանտազիա» ժանրային կինոյի փառատոնի ժամանակ (Fantasia Film Festival), որի արդյունքում ֆիլմն արժանացել է ժյուրիի հատուկ հիշատակմանը տեխնիկական և կոնցեպտուալ լուծումների համար, ինչպես նաև «Հանդիսատեսի համակրանք» մրցանակին` «Ամենանորարար ֆիլմ» ձևակերպմամբ, հաղորդում է ՌԻԱ Նովոստին:
Ֆիլմը նկարահանվել է found footage («գտած ժապավեն») ժանրում, ֆիլմի բյուջեն չի գերազանցել 500 հազար դոլարը: Ֆիլմի բոլոր գործողությունները տեղի են ունենում հերոսուհու համակարգչի էկրանին, որը Skype-ի միջոցով շփվում է իր ընկերների հետ: Մեկ տարի առաջ նրանց համադասարանցին ինքնասպան է եղել համացանցում նրանց կազմակերպած հետապնդումից հետո: Հանկարծ նրանց խոսակցությանը միանում է անհայտ մեկը, ում ներկայությունը սկզբում պարզապես նյարդայնացնում է դեռահասներին, իսկ հետո սկսում է սարսափեցնել:
Միահյուսված մեկ ցանցով
«Վաղուց էի ցանկանում ֆիլմ նկարահանել, որտեղ գործողությունները տեղի են ունենում համակարգչի էկրանին, սակայն ոչ ոք չէր հավաքում, որ հետաքրքիր կլինի 90 րոպե հետևել միայն հերոսների մոնիտորներին: Վերջիվերջո Bazelevz ստուդիայի ջանքերով Լոս Անջելեսում մենք գործընկերների հետ միասին ստեղծեցինք այս ֆիլմը», - ՌԻԱ Նովոստիին է ասել Բեկմամբետովը:
Նկարահանումների համար Լոս Անջելեսում վարձակալվել է մեծ առանձնատուն, որտեղ ստեղծվել են գլխավոր հերոսների վեց սենյակների դեկորացիաները: Դերասանները շփվում էին միմյանց հետ՝ գտնվելով առանձնատան տարբեր հարկերում և նայելով իրենց նոութբուքի տեսախցիկին:
Բեկմամբետովի խոսքով՝ նկարահանող խումբը տարվա ընթացքում նոր կինոլեզու էր մշակում: Գլխավոր բարդությունը մոնտաժն էր: Աշխատանքը տարվում էր 30 տեսաուղիներով, որոնցից յուրաքանչյուրի վրա տեսագրված էին առանձին տարրեր՝ մոնիտորի վրա մկնիկի շարժումը, պատուհանների փակելը, զրույցի տեքստը և այլն:
«Սովորական մոնտաժ անելու համար մենք ստիպված էինք կտրատել և առաջ շարժել տասնյակ մոնտաժային ուղիներ, սակայն արդյունքում մշակեցինք նոր տեխնոլոգիա, որը նախատեսում ենք օգտագործել հետագայում», - ավելացրել է Բեկմամբետովը:
Ֆիլմի իրացմամբ և մարկետինգով կզբաղվի Universal ընկերությունը: Ընկերության ներկայացուցիչները ֆիլմի իրավունքները գնելու որոշումն ընդունել են՝ գնահատելով թեստային ցուցադրությունների արդյունքներն ու հանդիսատեսի հետաքրքրությունը: Բեկմամբետովի հետ սա Universal-ի հետ համագործակցության առաջին փորձը չէ: 2008թ.-ին Universal-ի համար Բեկմամբետովը նկարահանել է «Առանձնապես վտանգավոր» մարտաֆիլմը, որտեղ գլխավոր դերերում հանդես են եկել Անջելինա Ջոլին, Ջեյմս Մաքևոյն ու Մորգան Ֆրիմանը:
Ֆիլմի համապրոդյուսերը Ջեյսոն Բլումն է, ով «Պարանորմալ երևույթ» սարսափ սերիալի, ինչպես նաև «Աստրալ» և «Սինիսթեր» ֆիլմերի ստեղծողներից է: Ֆիլմը ԱՄՆ-ի վարձույթում կհայտնվի 2015թ.-ի ապրիլի 10-ին: Ռուսաստանում ֆիլմի ցուցադրության օրը դեռ որոշված չէ, ֆիլմը դեռևս չունի պաշտոնական ռուսական անվանում:-0-
