Շառլ Ազնավուրը «Երեկոյան Ուրգանտ» ծրագրի հյուրը կլինի

ԵՐԵՎԱՆ, 30 սեպտեմբերի. /Նովոստի-Արմենիա/. Աշխարհահռչակ ֆրանսահայ շանսոնիե, գրող և դերասան Շառլ Ազնավուրը Ռուսաստանի Առաջին ալիքի «Երեկոյան Ուրգանտ» («Вечерний Ургант») ծրագրի հյուրը կլինի, նշվում է Facebook սոցցանցում հեռուստածրագրի էջում:

Ազնավուրի մասնակցությամբ հաղորդման տեսագրությունը կկայանա հոկտեմբերի 2-ին: Մեկ օր անց հայտնի շանսոնիեն համերգ կունենա Մոսկվայի Քրոքուս Սիթի Հոլլի բեմում:

Շառլ Ազնավուրը մեծանուն հայազգի կատարող և ստեղծագործությունների հեղինակ է, որոնցից շատերը ներառվել են ոչ միայն ֆրանսիական էստրադայի, այլ նաև համաշխարհային երաժշտական ժառանգության գանձադարանում: Շառլ Ազնավուրը CNN-ի կողմից ճանաչվել է XX դարի լավագույն էստրադային կատարող, նա առաջին ֆրանսիացի երգիչն է, ով Եվրոպայում պլատինե ձայնասկավառակ է ստացել:

Երգչի երգացանկում ավելի քան հազար երգեր կան, որոնցից մի մասը նա ինքն է կատարել, իսկ մի մասը ներառվել է Բոբ Դիլանի, Լայզա Մինելիի, Խուլիո Իգլեսիասի և այլ հայտնի կատարողների երգացանկերում: Շառլ Ազնավուրի ստեղծագործական կարիերայի ընթացքում ողջ աշխարհում վաճառվել է ավելի քան հարյուր միլիոն ձայնասկավառակ: Երգիչը միևնույն բեմում հանդես է եկել և սերտորեն համագործակցել այնպիսի վարպետների հետ, ինչպիսիք են՝ Լուչիանո Պավարոտին, Ֆրենկ Սինատրան, Պատրիցիա Կաասը, Սելին Դիոնը, Պլասիդո Դոմինգոն: Որպես դերասան՝ Շառլ Ազնավուրը նկարահանվել է 60 ֆիլմերում: -0-