Չիտա դի Կաստելոյի երաժշտական փառատոնը նվիրված էր Հայաստանին

ԵՐԵՎԱՆ, 11 սեպտեմբերի. /Նովոստի–Արմենիա/.  Իտալիայի Չիտա դի Կաստելո քաղաքում անցկացված երաժշտական փառատոնը 2014թ.–ին նվիրված էր Հայաստանին, հինգշաբթի հայտնեց Հայաստանի պետական ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։

«Մենք մասնակցեցինք չորս փառատոնի Ռիմինի, Չիտա դի Կաստելո, Մերանո և Ռավելո քաղաքներում։ Հատկանշական է, որ Չիտա դի Կաստելոյի փառատոնը բացեց մեր նվագախումբը։ Փառատոնի փակմանը հնչեց Խաչատրյանի ստեղծագործությունը»,– ասաց նա։

Հայաստանի պետական ֆիլհարմոնիկ նվագախումբն Էդուարդ Թոփչյանի ղեկավարությամբ ելույթ է ունեցել հյուրախաղերով Իտալիայում օգոստոսի 26–30–ը։ Հանդիսատեսին ներկայացվել են Արամ Խաչատրյանի «Ջութակի համար կոնցերտը», Մուսորգսկու «Գիշերը լերկ լեռան վրա» սիմֆոնիկ պոեմը, Ռիմսկի Կորսակովի «Շահրազադե» բալետի սյուիտը, «Ֆրանչեսկո դա Ռիմինի» սիմֆոնիկ պոեմը և Չայկովսկու «Պաթետիկ սիմֆոնիա N6»–ը։

Թոփչյանի խոսքով, Մերանոյի փառատոնում նվագախումբը նույն հարթակում ելույթ է ունեցել համաշխարհային լավագույն կոլեկտիվների հետ։ Նա նշեց նաև, որ մասնագետները Պետական ֆիլհարմոնիկ նվագախմբի ելույթները «գերազանց» են գնահատել։

Թոփչյանը նշեց, որ հյուրախաղերը կազմակերպվել են Հայաստանի նախագահի, կառավարության և մշակույթի նախարարության աջակցությամբ։

Հայաստանի պետական ֆիլհարմոնիկ նվագախումբը, որը 86 տարի առաջ հիմնել են հայ երաժիշտներ Արշակ Ադամյանը և Ալեքսանդր Սպենդիարյանը, տարիներ շարունակ եղել է նախկին ԽՍՀՄ–ի երաժշտական առաջատար կոլեկտիվներից մեկը։ Այսօր այն համարվում է պրոֆեսիոնալ նվագախմբային արվեստի ազգային կենտրոն։

Տարբեր ժամանակներում Հայաստանի պետական ֆիլհարմոնիկ նվագախումբը գլխավորել են Արշակ Ադամյանը, Ալեքսանդր Սպենդիարյանը, Սուրեն Չարեքյանը, Կոնստանտին Սարաջևը, Օհան Դուրյանը, Վալերի Գերգիևը, Լորիս Ճգնավորյանը։ 2000 թվականից նվագախմբի գեղարվեստական ղեկավարն ու գլխավոր դիրիժորն Էդուարդ Թոփչյանն է։

«Նովոստի–Արմենիա» գործակալությունը նվագախմբի տեղեկատվական հովանավորն է։ -0-