Deep Purple-ի լեգենդար նախկին կիթառահարի խումբը ելույթ կունենա Մոսկվայում

ԵՐԵՎԱՆ, 23 սեպտեմբերի. /Նովոստի-Արմենիա/. Deep Purple և Rainbow ռոք խմբերի լեգենդար կիթառահար Ռիչի Բլեքմորի (Ritchie Blackmore) և նրա կնոջ` Քենդիս Նայթի (Candice Night) Blackmore's Night ֆոլք-ռոք խումբն ուրբաթ Մոսկվայի «Կրոկուս Սիթի Հոլում» կներկայացնի նախորդ տարի արտիստների նորածին դստեր պատվին անվանված Autumn Sky նոր ալբոմը:

Ալբոմը ձայանգրվել է Քենդիսի հղիության ժամանակ: Անցյալ տարվա մայիսին աղջիկ է ծնվել, ում տվել են Օթըմ Էսմերալդա (Autumn Esmerelda) անունը, և նոր ալբոմը նվիրվել է հենց նրան:

Չնայած որ մոսկովյան համերգը կանցկացվի նոր սկավառակին նվիրված համաշխարհային տուրնեի շրջանակներում` առանց այնպիսի հիթերի, ինչպես, օրինակ, Wish You Were Here, համերգը չի կարող անցնել:

Բրիտանացի Ռիչի Բլեքմորը և ամերիկուհի Քենդիս Նայթը ծանոթացել են 1989 թվականին, երբ կիթառահարը Deep Purple-ի իր գործընկերների հետ ֆուտբոլ էր խաղում, իսկ այն ժամանակ Նյու Յորքի ռադիոկայանում աշխատող Քենդիս Նայթը նրանից ինքնագիր է խնդրել:

Ավելի ուշ Բլեքմորը հեռացել է Deep Purple-ից և վերստեղծել է Rainbow-ն, որտեղ Նայթը նախկինում բեք-վոկալիստ է եղել: 1996 թվականին երաժիշտները հիմնել են սեփական Blackmore's Night խումբը, որի հիմքը դարձել է Վերածննդի դարաշրջանի երաժշտությունը, իսկ իրենք` երաժիշտներն, օգտագործում են այն ժամանակվա գործիքներ և բեմական հանդերձանք: -0-