Բաքվում կայանալիք Եվրատեսիլ 2012-ում Հայաստանի մասնակցության հարցը կլուծվի մինչև տարեվերջ. ՀՀՌԽ ղեկավար

Բաքվում կայանալիք «Եվրատեսիլ 2012» երգի միջազգային մրցույթում Հայաստանի մասնակցության հարցն, ամենայն հավանականությամբ, վերջնականապես կլուծվի Ժնևում դեկտեմբերին կայանալիք Եվրոպական հեռարձակողների միության ժողովից հետո, չորեքշաբթի լրագրողներին տեղեկացրեց Հայաստանի հանրային հեռուստառադիոընկերության խորհրդի նախագահ Ալեքսան Հարությունյանը:

«Հայաստանը հենց Եվրոպական հեռարձակողների միությունից իր պատվիրակության անվտանգության երաշխիքներին է սպասում: Մեզ հարկավոր են հենց միության երաշխիքները, այլ ոչ թե ադրբեջանական կիսատ երաշխիքները», - հայտարարեց Հարությունյանը:
Ինչպես նշեց Հարությունյանը, հակառակ դեպքում Հայաստանը չի կարող Բաքու ուղարկել 30-40 հոգանոց պատվիրակություն:

Միաժամանակ Հարությունյանը նշեց, որ հայկական պատվիրակության մասնակցության հարցը միակ խնդիրը չէ, որը պետք է քննարկվի Ժնևում:

«Մի քանի խոչընդոտներ կան Բաքվում «Եվրատեսիլի» անցկացման համար: Որքան ես գիտեմ, քննարկվում են մրցույթի անցկացման պահուստային տարբերակները, եթե Ադրբեջանը չկարողանա հաղթահարել այդ խոչընդոտները», - նշեց նա՝ միաժամանակ հույս հայտնելով, որ Ադրբեջանը կկարողանա վերացնել դժվարությունները:

Բաքուն «Եվրատեսիլ 2012» մրցույթը հյուրընկալելու հնարավորություն է ստացել՝ Դյուսելդորֆում 2011 թ.-ին կայացած միջազգային մրցույթում Նիքի (Նիգյար Ջամալ) և Էլլա (Էլդար Քասիմով) ադրբեջանական դուետի հաղթանակի շնորհիվ:

Ավելի վաղ Ադրբեջանի ԱԳՆ ղեկավարի տեղակալ Արազ Ազիմովը հայտարարել էր, որ իր երկիրը պատրաստ է ապահովել «Եվրատեսիլ-2012»-ի հայ մասնակիցների անվտանգությունը։
Սակայն հայկական կողմն անվտանգության լուրջ երաշխիքներ է ակնկալում Եվրոպայի հեռարձակման միությունից և Եվրատեսիլի անցկացման համար պատասխանատու միջազգային կազմակերպությունների կողմից։ -0-