«Մարաթուկ» ժողովրդական երգի և պարի համույթը նշում է իր 25-ամյակը

ԵՐԵՎԱՆ, 19 դեկտեմբերի./Նովոստի-Արմենիա/. Հայաստանի ազգային գրադարանում չորեքշաբթի հանդիսավոր նշեցին «Մարաթուկ» ժողովրդական երգի և պարի համույթի 25-ամյակը։

«Համույթի հիմնադիր Մգրո Մկրտչյանի համար Արևմտյան Հայաստանում գտնվող Մարաթուկ լեռը, որի պատվին էլ անվանվել է համույթը, կորցված հայրենիքի խորհրդանիշն էր։ Մգրոն ապրում էր ժողովրդական երգի-պարի համույթ ստեղծելու երազանքով»,- միջոցառման ընթացքում ասաց Ազգային գրադարանի տնօրեն Դավիթ Սարգսյանը։

Սարգսյանի խոսքով, ինքը՝ համույթի հիմնադիրը երաժշտական կրթություն չուներ, սակայն կոլեկտիվի կայացման համար հսկայական աշխատանք է տարել։

«Մկրտչյանը մեկ երգարանի մեջ հավաքել է ժողովրդական երգերի մեծ մասը, իսկ 1982թ. ստեղծել «Մարաթուկ» համույթը՝ իրականացնելով իր երազանքը»,- ավելացրեց նա։

Տնօրենը բարձր է գնահատել համույթի դերը երիտասարդ սերնդին ժողովրդական երաժշտությունը ներկայացնելու և ի պահ տալու գործընթացում։ «Այս երգերը երգել են մեր պապերը, և այսօր դրանք գիտի նաև երիտասարդությունը»,- ասաց նա։

Իր հերթին, «Մարաթուկի» գեղարվեստական ղեկավար Երվանդ Թորոսյանն ավելացրեց, որ վերջին ժամանակներս  Հայաստանում մեծացել է հետաքրքրությունը ժողովրդական ստեղծագործությունների հանդեպ։

«Մեր համույթը ելույթ է ունենում ոչ միայն բոլոր պետական տոնակատարություններին, այլև արտասահմանում, այդ թվում՝ Լիբանանում, Սիրիայում, Եգիպտոսում, Ռումինիայում, Անգլիայում, Բելգիայում, Ֆրանսիայում, Հոլանդիայում, ԱՄՆ-ում»,- ասաց նա։

Այս համատեքստում Թորոսյանն ավելացրեց, որ համույթը հաճախ է արտասահմանյան հյուրախաղերի հրավերներ ստանում։ Մասնավորապես, նրա խոսքով, Ֆրանսիայում Հայաստանի տարվան նվիրված միջոցառումների շրջանակներում «Մարաթուկը» համերգներով ելույթ է ունեցել ֆրանսիական մի քանի քաղաքներում։--0—