Ստեփանակերտն առաջին անգամ կհյուրընկալի հայկական տարազի փառատոնը

ԵՐԵՎԱՆ, 29 հուլիսի. /Նովոստի–Արմենիա/. Տարազի փառատոնը կանցկացվի օգոստոսի 4–ին Ստեփանակերտում, հայտնեց Երևանի քաղաքապետի օգնական Մարիա Բարաղամյանը։

Նա ընդգծեց, որ փառատոնն անցկացվում է երկրորդ տարի անընդմեջ քաղաքապետարանի «Երևանյան ամառ 2016» եռամսյա միջոցառումների ծրագրի շրջանակում:

«Սկզբում նախատեսվում էր անցկացնել փառատոնը օգոստոսի 5-ին Երևանում, բայց ավելի ուշ որոշվեց տեղափոխել այն Արցախի մայրաքաղաք: Ինչպես հայտնի է, հուլիսի 14-17-ը Երևանի քաղաքապետի գլխավորած պատվիրակությունը գտնվում էր Ստեփանակերտում, և այնտեղ որոշում է կայացվել տեղափոխել որոշ միջոցառումներ Արցախի մայրաքաղաք: Այսպիսով, Արցախից գալուց հետո մենք որոշեցինք անցկացնել տարազի փառատոնը Ստեփանակերտսւմ», – ուրբաթ ասուլիսի ժամանակ նշեց Բարաղամյանը:

Նրա խոսքով, միջոցառումն ուղղված է հայկական մշակույթի և մասնավորապես տարազի ժողովրդականացմանը ինչպես հայ հասարակության, այնպես էլ օտարերկրյա զբոսաշրջիկների շրջանում: «Մենք ցանկանում ենք, որպեսզի մարդիկ հայկական ազգային տարազի տարրերը ներառեն իրենց առօրյա հագուստի մեջ», - ավելացրեց Բարաղամյանը:

Նա ընդգծեց, որ միջոցառումը բաղկացած է երկու մասից` ցերեկային ցուցահանդես-վաճառքներ, որտեղ 16 տաղավարներում կներկայացվեն երևանցի և արցախցի ազգային վարպետների, ասեղնագործների, տիկնիկագործների, կավագործների աշխատանքները, իսկ երեկոյան կկայանա նորաձևության ցուցադրություն: «Այդ ամենը տեղի կունենա «Վերածնունդ» հրապարակում», - նշեց Բարաղամյանը:

«Տերյան» մշակութային կենտրոնի ղեկավար, դիզայներ Լիլիթ Մելիքյանն իր հերթին ավելացրեց, որ վերջին տարիներին տարազը մեծ հետաքրքրություն է առաջացնում հայ հասարակության և օտարերկրյա զբոսաշրջիկների շրջանում:

«Փորձից ելնելով` կարող եմ ասել, որ նախորդ տարի տեղի ունեցած միջոցառումը բավական հետաքրքիր ստացվեց, իսկ տարազի ցուցադրությունը վերածվեց նորաձևության շոուի: Այնտեղ ցուցադրվել էր ժամանակակից հագուստ` ազգային տարազի տարրերի օգտագործմամբ», - նշեց Մելիքյանը:

Նրա խոսքով, այս տարի ցուցադրությունն ավելի հետաքրքիր կլինի, քանի որ Ստեփանակերտում յուրահատուկ հետաքրքրությամբ են վերաբերվում հայկական ազգային հագուստին:

Միաժամանակ, դիզայներ Վահան Խաչատրյանը նշեց, որ փառատոնին մասնակցում է առաջին անգամ:
«Ես շատ ուրախ եմ, որ այս տարի մշակութային միջոցառումները չեն սահմանափակվում Հայաստանի մայրաքաղաքով: Շատ լավ է, որ Արցախի բնակիչները կարող են ծանոթանալ երևանցի նկարիչների արվեստին», - ավելացրեց Խաչատրյանը: -0-