Ամենաճանաչված հայ աստղերի ցուցակը գլխավորել է Քիմ Քարդաշյանը

ԵՐԵՎԱՆ, 18 հունվարի. /Նովոստի-Արմենիա/. «Ավրորա» մարդասիրական նախաձեռնության կողմից իրականացված հանրային կարծիքի հետազոտության արդյունքներով ամենաճանաչված հայ աստղերի ցուցակը գլխավորել է հեռուստաաստղ Քիմ Քարդաշյանը` հարցվողների ձայների 36 տոկոսով, հաղորդում է նախաձեռնության պաշտոնական կայքը:

Երգչուհի Շերին հայ աստղ են ճանաչել հարցվողների 25 տոկոսը, թենիսիստ Անդրե Աղասիին` 22 տոկոսը, բուռլեսկ ոճի շոուների պարուհի, ֆոտոմոդել, երգչուհի Դիտա Ֆոն Տիզին` 14 տոկոսը:

Հետազոտությունն իրականացրել է New Place Consultancy ընկերությունը՝ Kantar Group-ի TNS Opinion միջազգային սոցիալական հետազոտությունների գործակալության խորհրդատվությամբ: Հարցման խնդիրներից մեկն էր պարզել, թե որքանով է համաշխարհային լսարանը տեղյակ Հայաստանի, հայերի և «Ավրորա» մրցանակի մասին: Արդյունքները ցույց են տալիս, որ համաշխարհային հանրությունը հիմնականում գիտի հայկական համայնքների, հայկական խոհանոցի և պատմության մասին:

Ստացված արդյունքների համաձայն, նրանք, ովքեր լսել են «Ավրորա» մրցանակի մասին, մեծամասամբ դրական վերաբերմունք ունեն դրա նկատմամբ: Դրական վերաբերմունքի պատճառների թվում նշվում է, որ մրցանակը մեծարման է արժանացնում այնպիսի մարդկանց, ում աշխատանքն այլապես չէր ճանաչվի, ինչպես նաև նպաստում է աշխարհում հայերի դրական կերպարի ձևավորմանը:

«Հետաքրքրական է, որ չնայած հարցվածների մեկ երրորդի կարծիքով հայկական համայնքները կարևոր են իրենց երկրներում ինչպես պետական, այնպես էլ տեղական մակարդակներում, սակայն հարցվածների մեծամասնությունը համարում է, որ հայկական համայնքները փոքր դեր են խաղում իրենց երկրներում», - նշվում է հաղորդագրության մեջ:

Միաժամանակ, հայկական համայնքների ազդեցությունն ավելի շատ դիտարկվում է ինտելեկտուալ, մշակութային, սոցիալական և տնտեսական ոլորտներում: «Քիմ Քարդաշյանը և Շերը գլխավորում են ամենաճանաչված հայ հայտնիների ցանկը՝ ինչպես համաշխարհային հանրության, այնպես էլ սփյուռքահայերի շրջանում», - նշել են նախաձեռնությունից:

Հայաստանի Հանրապետության մասին դիտարկումները ցույց են տալիս, որ Հայաստանի նկատմամբ նշանակալի հետաքրքրվածություն կա` որպես երկիր և որպես ճամփորդական ուղղություն: Չնայած համաշխարհային հանրության ներկայացուցիչները Հայաստանը չեն դիտարկում որպես գործարարությամբ զբաղվելու վայր, սփյուռքահայերի զգալի մասը ցանկանում է տեղեկանալ Հայաստանի գործարար միջավայրի մասին: Երկու հայերից մեկը և յոթ օտարերկրացիներից մեկը հավանական է համարում, որ ապագայում կայցելի Հայաստան:

Հետազոտությունն իրականացվել է երկու փուլով՝ 2016 թվականի մարտին և հունիս-հուլիս ամիսներին, 10 երկրներում՝ ԱՄՆ, Կանադա, Ավստրալիա, Ֆրանսիա, Արգենտինա, Դանիա, Նորվեգիա, Հունաստան, Գերմանիա և Ռուսաստան:

Հետազոտության միևնույն չափումները (գիտելիք, իրազեկվածություն, հետաքրքրություն, ներգրավվածություն) դիտարկվել են նաև հայկական սփյուռքի շրջանում: Պարզվել է, որ հայերի մասին սփյուռքահայերի և օտարերկրացիների ընկալումները նման են. հայերը հիմնականում բնութագրվում են որպես հպարտ, ընկերասեր և հարգալից: -0-