Yandex.Տաքսին դուրս է եկել հայկական շուկա
ԵՐԵՎԱՆ, 1 հուլիսի. /Նովոստի–Արմենիա/. Yandex.Տաքսի ծառայությունը սկսել է աշխատել Երևանում։
Ծառայությունը թույլ է տալիս արագ ազատ մեքենա գտնել՝ առանց դիսպետչերին զանգահարելու, նշվում է ընկերության մամուլի ծառայության հաղորդագրության մեջ։
Ծառայությունը հասանելի է հայերեն, ռուսերեն և անգլերեն լեզուներով։ Պատվեր կարելի է կատարել բջջային հավելվածի կամ taxi.yandex.com կայքի միջոցով։
Հաղորդագրության համաձայն` ծառայությանը միացված է ավելի քան 250 մեքենա Երևանի 11 տաքսի ծառայություններից։ Շտապ պատվերները ծառայությունը փոխանցում է այն վարորդներին, ովքեր առավել մոտ են հաճախորդին, ինչի շնորհիվ մեքենան արագ է մոտենում պատվիրատուին։ Երևանում տաքսիի տրամադրման ժամանակը կկազմի 5-10 րոպե։
«Մեքենայի ժամանմանը կարելի է հետևել անմիջապես քաղաքի քարտեզի վրա, իսկ վարորդի հեռախոսի համարն ու մեքենայի պետհամարանիշը ծառայությունն ուղարկում է SMS հաղորդագրության միջոցով», – նշեցին ընկերությունից։
Ծառայության համար դեռևս կարելի է վճարել միայն կանխիկ դրամով։ Ուղևորության առաջին երկու կիլոմետրը կարժենա 100 դրամ, այնուհետ՝ 100 դրամ յուրաքանչյուր կիլոմետրի համար։ Առաջիկայում հաճախորդները կկարողանան վճարել նաև բանկային քարտով
«Մենք ցանկանում ենք ստեղծել ամենաարագ և մատչելի տաքսին Երևանում։ Մեր տեխնոլոգիաները դա թույլ են տալիս։ Պատվերների օպտիմալ բաշխումն օգնում է նվազեցնել մեքենայի մատուցման ժամանակը և վարորդների պարապուրդը։ Իսկ դա, իր հերթին, իջեցնում է երթևեկության ինքնարժեքը։ Մենք նաև ուշադիր ենք ծառայությունների որակի հանդեպ, հետևաբար շատ բարձր պահանջներ ենք ներկայացնում վարորդների աշխատանքին ու մեքենաների վիճակին», – նշել է Yandex.Տաքսիի գլխավոր տնօրեն Տիգրան Խուդավերդյանը։
Yandex Taxi vs gg. տաքսի պատվիրե՞լ եք>>
Ծառայությունում առկա է մեքենաների վիճակի վերահսկման սեփական համակարգ։ Օրինակ՝ վարորդները պարբերաբար ուղարկում են մեքենաների լուսանկարները տարբեր դիրքերից, որպեսզի ցույց տան, որ այն սարքին վիճակում է և պատրաստ է գիծ դուրս գալ։ Վարորդների աշխատանքը գնահատում են հենց հաճախորդները։ Նրանց գնահատականների հիման վրա ձևավորվում է վարորդների վարկանիշը, որն ազդում է պատվերների բաշխման վրա։ Պատվերներն առաջին հերթին ստանում են այն վարորդները, որոնցից գոհ են հաճախորդները։
Վարորդների աշխատանքի համակարգման համար կիրառվում է Յանդեքս Տաքսոմետր ծրագրային ապահովումը։ Դրա օգնությամբ վարորդները կարող են պատվերներ ընդունել, որոշել ուղևորության արժեքը և հետևել համակարգում սեփական վարկանիշին։ Ինչպես և ծառայությունը, ծրագրային ապահովումը հասանելի է հայերեն լեզվով։ Տաքսոմետրի մեջ ներմուծված է Նավիգատոր՝ Երևանի մանրամասն քարտեզով և տեղեկություններով խցանումների մասին իրական ժամանակում։ Հայաստանում ծառայության մեկնարկի կապակցությամբ Յանդեքսը հատուկ թարմացրել է Երևանի քարտեզը, որպեսզի հնարավոր լինի հեշտությամբ գտնել ցանկացած հասցե և որոշել օպտիմալ երթուղին:
Yandex.Տաքսի ծառայությունը գործարկվել է 2011թ-ին։ Բացի Երևանից, այն աշխատում է ռուսաստանյան 20 քաղաքներում և Մինսկում։ Նախատեսվում է ծառայությունը գործարկել Վրաստանում, Ղազախստանում և այլ երկրներում։ Ընդհանուր առմամբ, Yandex.Տաքսիին միացված է ավելի քան 70 հազար ավտոմեքենա շուրջ 500 տաքսոպարկերից և դիսպետչերականներից։
Հայկական շուկա դուրս գալու մասին Yandex.Տաքսիի հայտարարությունը, որն արվել էր հունիսի կեսերին, դժգոհության ալիք էր բարձրացրել հայկական հասարակության շրջանում` ինչպես նմանատիպ այլ ծառայությունների, այնպես էլ սովորական տաքսիստների կողմից, ովքեր անգամ կազմակերպեցին մի քանի բողոքի ակցիաներ` նշելով, որ նման ծառայությունների գործարկման միջոցով ստեղծվում են ոչ հավասար պայմաններ լիցենզավորման և հարկային վճարների տեսակետից։
ՀՀ տրանսպորտի և կապի նախարար Գագիկ Բեգլարյանն իր հերթին նշել է, որ Yandex.Տաքսիի նման ծառայությունները պետք է աշխատեն միայն լիցենզավորված տաքսիստների հետ կնքած պայմանագրերի հիման վրա։ –0–
