Վարչապետը ցանկանում է կրճատել ամանորի արձակուրդները

ԵՐԵՎԱՆ, 12 հունվարի. /Նովոստի–Արմենիա/. Հայաստանի վարչապետ Կարեն Կարապետյանը հինգշաբթի կառավարության նիստում առաջարկեց քննարկել ամանորի արձակուրդները կրճատելու հարցը։

Հայաստանի բնակիչներն ավանդաբար երկար տոնական արձակուրդներ են ունեցել, որոնք տևեցին դեկտեմբերի 31–ից հունվարի 8–ը ներառյալ։ «Տոների և հիշատակի օրերի մասին» օրենքի համաձայն, Նոր տարին և Սուրբծննդյան տոները Հայաստանում նշվում են դեկտեմբերի 31–ից հունվարի 6–ը, իսկ հունվարի 7–ը հանրապետությունում ոչ աշխատանքային է, քանի որ Մեռելոց է։

Հինգշաբթի կառավարության առաջին նիստում վարչապետը նշեց, որ այն շատ թեթև էր։

«Չնայած, որ նախորդ տարվա վերջում ասում էի, որ 2017 թվականը մեզ համար բարդ և ծանր կլինի, մեր առաջին նիստը բավականին թեթև անցավ։ Հույս ունեմ, որ մենք բոլորս լավ հանգստացել ենք, քանի որ իրականում 2017 թվականին աշխատանքային ռեժիմը զգալիորեն ծանր կլինի»,– նախազգուշացրեց Կարապետյանը։

Կառավարության ղեկավարն այնուհետև հետաքրքրվեց նախարարներից` արդյո՞ք, շատ չէին տոնական հանգիստ օրերը։ «Եկեք քննարկենք, այդ թվում` հասարակության հետ, և գտնենք այդ հարցի լուծումը»,– ասաց Կարապետյանը։

Ավելի վաղ վարչապետն ասել էր, որ անընդունելի է համարում այդքան երկար տոնակատարությունները։ Մասնավորապես, այդ պատճառով էլ, նրա առաջարկով, Նոր տարվա օրերին և հանգստյան օրերին բանկերը և մաքսային կառույցներն աշխատում էին արտակարգ ռեժիմով։ -0-