Վաղ է «թաղել» ԱՊՀ-ն՝ չնայած ինտեգրման նոր ձևերի առաջացմանը. Պրիխոդկո

ԵՐԵՎԱՆ, 19 դեկտեմբերի. /Նովոստի-Արմենիա/. Քսանամյակը նշող ԱՊՀ-ն նախկինի պես կենդանի և օգտակար մեխանիզմ է, չնայած հետխորհրդային տարածքում հայտնվում են ինտեգրման առավել առաջատար և նեղ մասնագիտական ձևաչափեր, հայտարարել է ՌԴ նախագահի օգնական Սերգեյ Պրիխոդկոն:

ԱՊՀ երկրների գրեթե բոլոր առաջնորդները երեքշաբթի կհավաքվեն Մոսկվայում՝ մասնակցելու ոչ պաշտոնական գագաթնաժողովին, որին կնախորդի կազմակերպության հոբելյանին նվիրված հանդիսավոր ընդունելությունը, հաղորդում է «ՌԻԱ Նովոստին»:

«Կարծում եմ, որ ԱՊՀ-ն այնպիսի կենդանի և օգտակար մեխանիզմ է, որն արձագանքում է և առանձին երկրում հայտնված քաղաքական նոր իրողություններին, և ինտեգրմանը վերաբերող գերիշխող տրամադրությանը: Դեռևս վաղ է թաղել ԱՊՀ-ն: Ամեն դեպքում մեզ թվում է, որ ոչ ոք դա չի էլ պատրաստվում անել», - ասել է Պրիխոդկոն լրագրողներին:

«Խորհրդային Միության մասին անցյալի աղոտ հուշերն ավելի հաճախ իրենց տեղը զիջում են իրատեսական, պրագմատիկ աշխատանքի կոնկրետ ուղղություններին: Կարծում եմ, որ դա շատ օգտակար աշխատանք է: Ընդհանրապես, ԱՊՀ-ի գոյությունը հսկայական կայունացնող դեր է խաղում ամեն պետության համար, հսկայական դեր է խաղում կոլեկտիվ որոշումների մշակման գործում՝ ի պատասխան նոր գլոբալ մարտահրավերներին, ընդհանուր տարածքում համագործակցության ռազմավարական հարցերի որոշումների մշակմանը», - հայտարարել է ՌԴ նախագահի օգնականը:

Պրիխոդկոն հատկապես ընդգծել է ԱՊՀ-ի նշանակությունը՝ նախկին խորհրդային հանրապետությունների միջև երկխոսության շարունակականության ապահովման և ինտեգրացիոն գործընթացների իրականացման համար: «Անկախ ԱՊՀ-ի նկատմամբ վերաբերմունքից, վերլուծաբանների և քաղաքական գործիչների քաղաքական հակումներից, նրանց տարիքից և արտահայտությունների ժամանակից, իմ խորը համոզմամբ, ԱՊՀ-ն մեծ մասամբ ապահովել, ապահովում և միգուցե առաջիկայում էլ կապահովի ԱՊՀ բոլոր երկրների ղեկավարությունների երկխոսության շարունակականությունը, ինչպես նաև շարունակականությունը ինտեգրացիոն հեռանկարներում և այդ գործունեության ուղղությամբ», - ասել է նա:

ԱՊՀ պետությունների ղեկավարների խորհրդի մոսկովյան նիստը չունի ֆիքսված օրակարգ, սակայն Պրիխոդկոյի խոսքերով՝ մասնակիցների ուշադրության կենտրոնում կլինեն «ԱՊՀ աշխատանքից ստացվող գործնական արդյունքների բարձրացման հարցերը՝ ելնելով քաղաքացիների բարեկեցության և կենսամակարդակի աճի շահերից»: Մասնավորապես, նախագահները կքննարկեն առաջարկը, ըստ որի՝ 2012 թ.-ին տնտեսության ոլորտում փոխգործակցության առանցքային թեման պետք է լինի կապի և ինֆորմատիզացիայի ոլորտում իրականացվող համագործակցությունը: -0-