«Բելտրանսգազ» ԲԲԸ-ն վճարել է գազի մայիսյան մատակարարումների դիմաց, գումարը կազմել է 260,134 միլիոն դոլար, ինչը համապատասխանում է պայմանագրի պայմաններին, հաղորդում է «ՌԻԱ Նովոստին»` հղում անելով «Գազպրոմին»:
«Կատարած վճարի գումարն է 260,134 միլիոն դոլար: Այն հաշվարկված է «Բելտրանսգազի» կողմից` 2006 թ.-ի դեկտեմբերի 31-ին կնքված գազի մատակարարման պայմանագրի համաձայն: Այսպիսով, բելառուսական կողմը ընդունել է պայմանագրում ամրագրված գնով գազի դիմաց վճարելու անհրաժեշտությունը», - ասվում է տեղեկատվության մեջ:
Միաժամանակ «Գազպրոմը» հայտարարում է, որ «Բելտրանսգազը» պարտավոր է անհապաղ վճարել Բելառուս ռուսական գազի մատակարարման համար 2010 թ.-ի սկզբից կուտակված պարտքը, որը կազմում է 192 միլիոն դոլար:
Բելառուսի համար ռուսական գազի պայմանագրային գինը երկրորդ եռամսյակում կազմում է 184,8 դոլար` հազար խորանարդ մետրի դիմաց: Այս տարվա առաջին եռամսյակում այն կազմում էր 169,2 դոլար, երրորդ եռամսյակում կավելանա` հասնելով 193-194 դոլարի, տարվա ընթացքում միջինը սպասվում է 187 դոլար՝ հազար խորանարդ մետրի դիմաց:
Բելառուսը 2010 թ.-ի սկզբից գազի համար Ռուսաստանին վճարում էր ոչ թե ըստ պայմանագրի, այլ նրա կողմից միակողմանի կարգով սահմանված գնով` 150 դոլար հազար խորանարդ մետրի դիմաց, ինչի հետևանքով Բելառուսը պարտք է կուտակել:
«Գազպրոմը» բելառուսական կողմի պարտքերի պատճառով երկուշաբթի սկսել է Բելառուս գազի մատակարարման սահմանափակումներ մտցնել: Երեքշաբթի, երբ մատակարարումները կրճատվեցին արդեն 30 տոկոսով, Բելառուսի նախագահ Ալեքսանդր Լուկաշենկոն, հայտարարեց, որ հանձնարարել է դադարեցնել ՌԴ-ից Եվրոպա գազի տարանցումը:
Չորեքշաբթի «Գազպրոմը» պարտքի դիմաց բելառուսական կողմի գազի մատակարարման սահմանափակումը հասցրեց 60 տոկոսի` կրճատելով մատարարումը ևս 30 տոկոսով: Միաժամանակ Ռուսական գազային հոլդինգի ղեկավար Ալեքսեյ Միլերը տեղեկացրել է, որ հանրապետության տարածքով գազի մատակարարումը եվրոպացի սպառողներին իրականացվում է պլանային ծավալով, և ռուսական գազի սպառողները գազի հետ կապված ոչ մի խնդիր չունեն:-0-
