Ռուսաստանի 12 ամենաճանաչված պատմական անձանց անունները կհայտարարվեն չորեքշաբթի

«Անունը Ռուսաստան» նախագծի  12 ամենաազդեցիկ  պատմական անձանց ցուցակը կհրապարակվի չորեքշաբթի, ասվում է «Ռոսիա» հեռուստաալիքի մամուլի հաղորդագրությունում։

«Ռոսիա» հեռուստաալիքի «Անունը Ռուսաստան» նախագիծը մեկնարկեց այս տարվա մայիսին, հայտնում է ՌԻԱ Նովոստին։ Այն սկսվեց ՌԳԱԱ Ռուսաստանի պատմության ինստիտուտի մասնագետների կողմից կազմած 500 առավել հայտնի ռուսների ցուցակի հրապարակումից։ Հավակնորդների թվում էին տարբեր ժամանակաշրջանների ներկայացուցիչներ՝ սկսած Օլեգ Մարգարեից և իշխանուհի Օլգայից մինչև մեր ժամանակակիցներ քաղաքագետ Անատոլի Սոբչակն ու Իգոր Մոիսեևը։

«Ցուցակ 500»-ի հրապարակումից հետո «Հասարակական կարծիք» հիմնադրամը (ՀԿՀ) ռուսների շրջանում նախապատվությունների սոցիոլոգիական հետազոտություն անցկացրեց։ Հարցմանը մասնակցեց 12 հազար մարդ ամբողջ Ռուսաստանից։ Միաժամանակ քվեարկությունն անցկացվում էր նաև «Անունը Ռուսաստան» ինտերնետային կայքում։ ՀԿՀ հետազոտության և ինտերնետ-քվեարկության հիման վրա առանձնացվեցին 50 պատմական դեմքեր, որոնք շարունակեցին պայքարը ազգի խորհրդանիշի կոչման համար։

Չորեքշաբթի կհրապարակվեն Ռուսաստանում առավել հանրաճանաչ և հայտնի 12 պատմական դեմքերի անունները, ինչից հետո «Ռոսիա» հեռուստաալիքի եթերում կհայտնվի եզրափակիչ դուրս եկածներից յուրաքանչյուրին նվիրված հեռուստաշոու։ Մրցույթի եզրափակիչ փուլում կհայտարարվի հեռախոսային և sms-քվեարկություն։

Տարբեր ժամանակներում որպես առաջատար հանդես էին գալիս Պյոտր Առաջինը, Իոսիֆ Ստալինը, Վլադիմիր Լենինը, Սերգեյ Ռադոնեժսկին։ Հուլիսի 15-ին «Անունը Ռուսաստան» նախագծի կայքը ենթարկվեց հակերների գրոհի, ինչպես նաև որոշ ինտերնետ-ռեսուրսների կողմից կազմակերպվեց զանգվածային քվեարկություն Ստալինի օգտին, ինչի պատճառով ձայների ընդունումը որոշ ժամանակով դադարեցվեց։

Ներկայում վարկանիշով առաջատարի դիրքում է Ալեքսանդր Նևսկին, երկրորդ տեղում է Իոսիֆ Ստալինը, երրորդ տեղն է զբաղեցրել Ալեքսանդր Երկրորդը։ Եզրափակիչ կարող են դուրս գալ նաև Պյոտր Առաջինը, Պյոտր Ստոլիպինը, Ալեքսանդր Սուվորովը, Ֆյոդր Դոստոևսկին, Ալեքսանդր Պուշկինը, Ելիզավետա Երկրորդը։

«Անունը Ռուսաստան» նախագծի հաղթողը՝ ազգը խորհրդանշող պատմական անձը, կհրապարակվի տարեվերջին։ -0-