Քրեաօլիգարխիկ համակարգը վերջնականապես պետք է արմատախիլ արվի Հայաստանից․ Փաշինյան
ԵՐԵՎԱՆ, 8 հունիսի․/Նովոստի–Արմենիա/․ Քրեաօլիգարխիկ համակարգը վերջնականապես պետք է արմատախիլ արվի Հայաստանից, հայտարարեց ՀՀ վարչապետ Նիկոլ Փաշինյանն ԱԺ ընտրություններից հետո իր առաջին ասուլիսի ժամանակ։
«Մեր առաջնահերթ անելիքը մեր քաղաքացիների պահանջն է՝ քրեաօլիգարխիկ համակարգը վերջնականապես պետք է արմատախիլ արվի ՀՀ-ից։ Իմ ասելիքը և պլանը չի փոխվել. այդ ուժերի լիդերները պետք է բերվեն պատասխանատվության Հայաստանի Հանրապետության օրենսդրությամբ սահմանված կարգով: Դրանք քրեական պատասխանատվության պետք է ենթարկվեն Ձեզ հայտնի գործերով, և քրեաօլիգարխիայի ունեզրկումը պետք է շատ մեծ տեմպերով և արագ տեղի ունենա՝ ապօրինի գույքի բռնագանձման մեխանիզմով, քրեական գործերով, պետական շահերի պաշտպանության համակարգով, համայնքային շահերի պաշտպանության համակարգով», – հայտարարեց Փաշինյանը։
Հունիսի 5-ին կայացած հանրահավաքում Փաշինյանը կրկին հանցագործությունների մեջ է մեղադրել ընդդիմադիրներ Ռոբերտ Քոչարյանին, Սամվել Կարապետյանին և Գագիկ Ծառուկյանին՝ սպառնալով նրանց քրեական հետապնդմամբ։
Փաշինյանը նրանց գլխավորած քաղաքական կուսակցությունները կրկին անվանել է «պատերազմի եռագլուխ կուսակցություն»՝ հայտարարելով, որ այն չպետք է անցնի խորհրդարան 2026 թվականի հունիսի 7-ի ընտրությունների արդյունքում։
Ռոբերտ Քոչարյանի մասին
Փաշինյանը հայտարարել է Ռոբերտ Քոչարյանին բանտ ուղարկելու մտադրության մասին։
«Քոչարյանն ընտրություններից անմիջապես հետո պետք է կալանավորվի և կանգնի դատարանի առաջ 2008 թվականի մարտի 1-ի հանցագործության համար... Մարտի 1-ի գործով հանցագործությունների մեղավորները պետք է երկար տարիներով բանտ նստեն։ Գլխավոր դատախազությունը նրա ընտանիքից պահանջում է 200 միլիոն դոլարի ապօրինի ձեռք բերված գույք և ֆինանսական միջոցներ, և դատական համակարգը պետք է այդ թալանվածը վերադարձնի Հայաստանի Հանրապետությանը», - հայտարարել է Փաշինյանը։
Կարապետյանի մասին
Կառավարության ղեկավարը սպառնալիքներ է հնչեցրել նաև «Ուժեղ Հայաստան» կուսակցության առաջնորդ, «Տաշիր Գրուպի» նախագահ Սամվել Կարապետյանի հասցեին՝ նրան անվանելով «կալուգացի օլիգարխ, ով զորամասերում պտտում էր էլեկտրաէներգիայի հաշվիչները»։
«Դրանով իսկ նա թալանել է բանակը և պետք է ենթարկվի ամենախիստ պատասխանատվության։ Նաև կալուգացի օլիգարխը պետք է պատասխան տա Հայաստանի ներքաղաքական օրակարգ 300 հազար ադրբեջանցիների մասին կեղծ, լրտեսական թեզ ներմուծելու համար», - ասել է նա։
Ծառուկյանի մասին
«Բարգավաճ Հայաստան» կուսակցության առաջնորդ, «Մուլտի Գրուպի» նախագահ Գագիկ Ծառուկյանի վերաբերյալ Փաշինյանն ասել է, որ Գլխավոր դատախազությունը պահանջում է նրանից բռնագանձել ավելի քան 300 միլիոն դոլարի ապօրինի գույք, և դատական համակարգը պետք է որքան հնարավոր է շուտ թալանվածը վերադարձնի պետությանն ու ժողովրդին։
«Ծառուկյանը, նրա սանձարձակ կողմնակիցները և որդին պետք է քրեական պատասխանատվության ենթարկվեն իրենց հանցագործությունների համար», - հայտարարել է նա։
