Ինչո՞ւ է Ղարաբաղից տեղահանվածների կենսաչափական նոր անձնագրում ծննդավայրը նշվում Ադրբեջան. Միգրացիայի ծառայությունից պարզաբանում են

20.11.2026, 11:03
ՆԳՆ–ից պարզաբանել են, թե ինչու է Ղարաբաղից տեղահանվածների նոր անձնագրերում որպես ծննդավայր նշվում Ադրբեջանը
Ինչո՞ւ է Ղարաբաղից տեղահանվածների կենսաչափական նոր անձնագրում ծննդավայրը նշվում Ադրբեջան. Միգրացիայի ծառայությունից պարզաբանում են

ԵՐԵՎԱՆ, 20 նոյեմբերի․ /Նովոստի–Արմենիա/․ ՆԳՆ Միգրացիայի և քաղաքացիության ծառայությունը պարզաբանել է, որ կենսաչափական փաստաթղթում «ծննդյան վայրը» նշման դաշտը կարգավորվում է ISO 3166 ստանդարտով։

«Ղարաբաղից տեղահանված և ՀՀ քաղաքացիություն ստացած անձանց կենսաչափական նոր փաստաթղթերում «ծննդյան վայր» դաշտում նշվում է՝ Ադրբեջան։

Ինչպես բազմիցս պարզաբանել ենք (https://armenpress.am/hy/article/1216549/amp ), հարկ ենք համարում ևս մեկ անգամ պարզաբանել, որ անձը հաստատող փաստաթղթերում տվյալների ամրագրումը կատարվում է միջազգային ստանդարտին համապատասխան։ Մեքենաընթերցվող անձը հաստատող/ճամփորդական փաստաթղթերի թողարկման ոլորտը կարգավորվում է ICAO (Քաղաքացիական ավիացիայի միջազգային կազմակերպություն) 9303 ստանդարտով, որում նշվում է, որ ծննդյան վայրը նշման դաշտը կարգավորվում է ISO 3166 ստանդարտով։ Վերջինս, ըստ պետությունների, ամրագրում է այն աշխարհագրական միավորները, որոնց վերաբերյալ նշումն ընդունելի է անձնագրում», - նշված է հաղորդագրության մեջ։

Ըստ այդմ՝ ոլորտի լիազոր մարմնի՝ ՆԳՆ միգրացիայի և քաղաքացիության ծառայության կողմից կատարվող ցանկացած նշում, որը վավերացված չէ միջազգային կարգավորման շրջանակում, խնդրահարույց է սահմանային անցման կետերում:

Տարբեր երկրների սահմանային վերահսկողություն իրականացնող մարմինների կողմից հին նմուշի կապույտ անձնագրերում առկա նշումների վերաբերյալ բազմաթիվ ահազանգեր են ստացվել ՆԳՆ միգրացիայի և քաղաքացիության ծառայությունում։

Ծառայության ամենօրյա գործունեության ընթացքում հին նմուշի կապույտ անձնագրերում առկա նշումների հետ կապված խնդիրները գործընկերային ճանապարհով հնարավորինս կարգավորվում էին։ Նոր կենսաչափական համակարգի ներդրմամբ սահմանվել է միասնական մոտեցում՝ ISO 3166 ստանդարտն ապահովելու և սահմանային կետերում խնդիրները բացառելու նպատակով:

Կարդացեք նաև․ Ի՞նչ տվյալներ են պահվում կենսաչափական անձնագրի չիպում, և հնարավո՞ր է դրանք կարդալ հեռվից․ պարզաբանում