Հինգշաբթի` հունիսի 6–ի առավել ուշագրավ նորությունները
08:00
07 Հունիսի 2019
ԵՐԵՎԱՆ, 7 հունիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է հինգշաբթի` հունիսի 6–ի առավել ուշագրավ նորությունների իր տարբերակը։
Կալանքի տակ գտնվող գեներալ Մանվել Գրիգորյանի առողջական վիճակը ծանր է մնում, նա բժիշկների հսկողության ներքո է։ Այդ մասին «Նովոստի–Արմենիա» գործակալությանը հայտնեց «Սուրբ Գրիգոր Լուսավորիչ» բժշկական կենտրոնի փոխտնօրեն Պետրոս Մանուկյանը։
Նախօրեի գիշերը Գրիգորյանի առողջական վիճակը կտրուկ վատացել է։ Նա ՔԿՀ–ից տեղափոխվել է քաղաքային հիվանդանոց։ Նրա առողջական վիճակը գնահատվել է ծանր և գրեթե նախակոմատոզ։
Վարչապետ Նիկոլ Փաշինյանը հինգշաբթի կառավարության նիստից առաջ կոչ է արել ոստիկանությանը դիմել կոշտ քայլերի բռնության քարոզի դեմ։ Նա հանձնարարականներ է տվել ոստիկանապետ Վալերիյ Օսիպյանին և ԱԱԾ տնօրեն Արթուր Վանեցյանին։ «Իշխանություններն օպերատիվ տեղեկություններ ունեն, որ որոշ հատված որոշել է սևազգեստ մարդկանց խմբեր ձևավորել, որոնք քաղաքում պետք է շրջեն, տրամադրություն ստեղծեն, որոշակի լկտի պահվածքով աչքի ընկնեն։ Ինչ վերաբերում է այդ սևազգեստ խմբերին, ապա այդ սևազգեստ խմբերին պետք է տեղորոշել, սև շորերի հարցը լուծել, ծաղկավոր «բաբչկան» կապել և հնարավորինս վառ ծաղիկներով ճանապարհել քաղաքակիրթ, օրինական կյանք», – մասնավորապես նշել է Նիկոլ Փաշինյանը։
Սննդամթերքի անվտանգության պետական ծառայությունը ստուգումներ է անցկացնում Սյունիքի մարզի գյուղերից մեկում խոզի աֆրիկյան ժանտախտի բռնկման լուրերի վերաբերյալ:
Ուսանողուհին խաբեությամբ 1.000.000 ՀՀ դրամ է պահանջել ազգականներից, հաղորդում է ՀՀ ՔԿ մամուլի ծառայությունը: -0-