ԵՐԵՎԱՆ, 6 հունիսի./Նովոստի–Արմենիա/. Կալանքի տակ գտնվող գեներալ Մանվել Գրիգորյանի առողջական վիճակը ծանր է մնում, նա բժիշկների հսկողության ներքո է։ Այդ մասին «Նովոստի–Արմենիա» գործակալությանը հայտնեց «Սուրբ Գրիգոր Լուսավորիչ» բժշկական կենտրոնի փոխտնօրեն Պետրոս Մանուկյանը։
Նախօրեի գիշերը Գրիգորյանի առողջական վիճակը կտրուկ վատացել է։ Նա ՔԿՀ–ից տեղափոխվել է քաղաքային հիվանդանոց։ Ինչպես
ավելի վաղ հաղորդվել էր, նախկին պատգամավորը հիվանդանոց էր տեղափոխվել կոմայի վիճակում։
«Գրիգորյանը հիվանդանոց է տեղափոխվել «Շտապօգնության» մեքենայով հունիսի 6–ի լույս գիշերը 1։30–ի-2։00–ի սահմաններում կողմերի համաձայնությամբ և ստացված ահազանգով։ Նրա առողջական վիճակը գնահատվել է ծանր և գրեթե նախակոմատոզ, քանի որ արյան մեջ շաքարի մակարդակը բավականին բարձր էր և որոշակի տոքսիկացիա կար»,– ասաց Մանուկյանը, ընդգծելով, որ Գրիգորյանը կոմայում չի եղել։
Նրա խոսքով, հիվանդանոց տեղափոխվելուց հետո Գրիգորյանն անհապաղ տարվել է վերակենդանացման բաժանմունք, որտեղ համապատասխան բժշկական միջամտություն է կատարվել։
«Այս պահին նրա առողջական վիճակը գնահատվում է ծանր։ Նա շարունակում է բուժում ստանալ վերակենդանացման բաժանմունքում»,– ասաց Մանուկյանը։ -0-
