ԵՐԵՎԱՆ, 6 հունիսի. /Նովոստի-Արմենիա/. ՀՀ սննդամթերքի անվտանգության պետական ծառայությունը ստուգումներ է անցկացնում Սյունիքի մարզի գյուղերից մեկում աֆրիկյան խոզի ժանտախտի բռնկման լուրերի վերաբերյալ: Այս մասին «Նովոստի-Արմենիա» գործակալությանը հայտնեց ՍԱՊԾ մամուլի քարտուղար Անուշ Հարությունյանը:
«Մենք ստացել ենք ահազանգ մեծ քանակությամբ խոզերի անկման մասին, հիմա ուսումնասիրվում է իրավիճակը: Կարծում եմ, որ հաջորդ շաբաթ արդեն հայտնի կդառնան ստուգումների արդյունքները», - հայտնեց Հարությունյանը:
Ինչպես հայտնում է shamshyan.com-ը, Սյունիքի մարզի Կոռնիձոր համայնքում մեծ քանակությամբ խոզերի անկում է գրանցվել: Տեղի բնակիչներից մեկը հայտնել է, որ մոտ 400 գլուխ խոզից մնացել է 10 փոքր խոզ: Նա ենթադրել է, որ անկման պատճառն աֆրիկյան խոզի ժանտախտն է, որը տարածված է նաև այլ մոտակա գյուղերում:
Համայնքի բնակիչները դիմել են Գյուղնախարարություն, ՍԱՊԾ, նամակ են գրել վարչապետ Նիկոլ Փաշինյանին: Գյուղապետարանը առաջարկել է օգնել հորել սատկած խոզերը:-0-
