Գյումրու քաղաքապետի թեկնածու Ռուբեն Մխիթարյանը հրավիրվել է Քննչական կոմիտե (ՎԻԴԵՈ)
ԵՐԵՎԱՆ, 20 մարտի․/Նովոստի–Արմենիա/․ Գյումրու քաղաքապետի թեկնածու Ռուբեն Մխիթարյանին կանչել են Քննչական Կոմիտե՝ հարցաքննության։
Այդ մասին Մխիթարյանը հայտնել է Facebook–յան իր էջում՝ հրապարակելով քննիչի հետ խոսակցության ձայնագրությունը։
Նշենք, որ փետրվարի 12–ին ռեժիսոր, պրոդյուսեր, Hayat Project–ի համահիմնադիր Ռուբեն Մխիթարյանը հայտնեց, որ պատրաստվում է մասնակցել Գյումրու քաղաքապետի ընտրություններին։
Նա նշել է, որ Գյումրու քաղաքապետի պաշտոնն իր համար ինքնանպատակ չէ, նա առաջարկում է իրական այլընտրանք։ Մխիթարյանը նաև հայտնել է, որ ընտրություններում օրվա իշխանությունները հաջողություն չպետք է գրանցեն։
«Այդ արդյունքին հասնելու համար ես պատրաստ եմ համագործակցել նման հստակ դիրքորոշում ունեցող մնացած բոլոր թեկնածուների հետ», – նշել է Մխիթարյանը։
Գյումրիում քաղաքական ճգնաժամի մասին
2024 թվականի հոկտեմբերի վերջին Գյումրու քաղաքապետ Վարդգես Բալասանյանը հրաժարականի դիմում է ներկայացրել։ Քաղաքի ավագանիում նրա գլխավորած իշխող «Բալասանյան» խմբակցության անդամները նույնպես ամբողջ կազմով հրաժարվեցին մանդատներից՝ այդ մասին արձանագրություն ներկայացնելով ընտրական հանձնաժողով։
Ըստ մամուլի հրապարակումների՝ իշխող խմբակցության նման գործողությունների պատճառը նախկին քաղաքապետ Սամվել Բալասանյանի և նրա համախոհների դեմ քրեական գործի հարուցումն է։ Նրանք մեղադրվում են պատմական Սև բերդին հարող հողատարածքների ապօրինի յուրացման մեջ։
Հայաստանի կառավարությունը 2024 թվականի դեկտեմբերի 12-ին որոշում կայացրեց կասեցնել Գյումրու ավագանու գործունեությունը։ Մեկ այլ որոշմամբ՝ նշանակվեցին արտահերթ ընտրություններ։ Որոշումն ուժի մեջ է մտնում փետրվարի 25-ից։ Հայաստանի պատմության առաջին փրայմերիզների արդյունքներով՝ Գյումրու քաղաքապետի ժամանակավոր պաշտոնակատարի պարտականությունները կատարում է Սարիկ Մինասյանը։
Գյումրի համայնքի ավագանու արտահերթ ընտրությունները կանցկացվեն մարտի 30–ին։
