ԵՄ-ն Հայաստան է ուղարկել հեռակառավարվող ականազերծման 2 մեքենաներից մեկը (ՎԻԴԵՈ)
ԵՐԵՎԱՆ, 8 հուլիսի․/Նովոստի–Արմենիա/․ ԵՄ-ն Հայաստանին տրամադրել է մոտ 20 տոննա կշռող հեռակառավարվող ականազերծման մեքենա։
«Այն կօգնի հանրապետության տարածքում վտանգավոր ճանաչված գոտիներում մարդասիրական ականազերծման աշխատանքներին», - նշում է կառավարությունը։
Հումանիտար ականազերծման և փորձագիտական կենտրոնի տնօրեն Էդուարդ Պետրոսյանը նշեց, որ այն կբերի ռիսկերի, դժբախտ դեպքերի նվազեցմանը և, ըստ էության, կնպաստի նաև տարածքների սոցիալ-տնտեսական զարգացմանը։
Կառավարությունից նշում են, որ Հայաստանի հինգ մարզերում՝ Տավուշում, Սյունիքում, Վայոց ձորում, Արարատում և Գեղարքունիքում կան վայրեր, որտեղ կարող են մնացած լինել ականներ կամ պատերազմի պայթունավտանգ մնացորդներ։ Նախնական պաշտոնական գնահատմամբ՝ սա ընդգրկում է մոտավորապես 43 միլիոն քառակուսի մետր տարածք։
«Հաշվի առնելով, որ չկա փորձառություն այս պահին լեռնային պայմաններում այս տեխնիկայի շահագործման, ԵՄ աջակցությամբ լավագույն միջազգային փորձագիտական խմբերը հիմա մեզ և մեր գործընկերների հետ աշխատում են, որ կարողանան նախնական ցուցանիշներ ձևավորել, որի հիման վրա մենք կներկայացնենք կառավարությանը առաջարկություն՝ ազգային չափորոշիչները վերանայելու և արդյունքային ցուցանիշները էականորեն բարելավելու», - ասաց Պետրոսյանը։
Հումանիտար ականազերծման աշխատանքները Հայաստանում պաշտոնապես մեկնարկել են դեռևս 2002 թվականին: Ազգային չափորոշիչները ներդրվել են 2014 թվականից: Այս ընթացքում մաքրված տարածքում որևէ միջադեպ չի գրանցվել:
Տեխնիկաները կօգտագործվեն նաև Հայաստանի և Ադրբեջանի միջև պետական սահմանի սահմանազատման աշխատանքներում։
Հայաստանը շուտով կստանա նաև շտապօգնության 2 մեքենա՝ անհրաժեշտ հագեցվածությամբ, ինչպես նաև՝ ԵՄ շարունակական աջակցության շրջանակում 2026 թվականի աշնանը նախատեսվում է տրամադրել ևս մեկ ականազերծման մեքենա։
