Դուրս չի գալիս կապի․ ԲՀԿ-ում Բագրատյանի հեռանալու մասին իմացել են ԶԼՄ-ներից

ԵՐԵՎԱՆ, 23 հուլիսի, /Նովոստի-Արմենիա/․ «Բարգավաճ Հայաստան» խմբակցության պատգամավոր Իվետա Տոնոյանը «Նովոստի-Արմենիա» գործակալությանը մեկնաբանել է պատգամավոր Սերգեյ Բագրատյանի ԲՀԿ-ից հեռանալու մասին լուրը։

Ավելի վաղ ՀՀ Ազգային ժողովի կայքում հայտարարություն էր հրապարակվել, որ պատգամավոր Սերգեյ Բագրատյանը Ազգային ժողովի նախագահին տեղեկացրել է այն մասին որ լքում է «Բարգավաճ Հայաստան» խմբակցությունը։

«Մենք ինքներս դրա մասին ԶԼՄ-ներից ենք իմացել։ Ոչ մի կերպ չեմ կարող մեկնաբանել պրն․ Բագրատյանի այդ քայլը, քանի որ չգիտեմ, նրա դրդապատճառները»,- ասաց Տոնոյանը։

Այն հարցին, թե արդյոք եղել են Բագրատյանի հետ կապ հաստատելու փորձեր, նա պատասխանեց, որ անձամբ՝ ոչ, բայց գիտի, որ իր գործընկերները փորձել են, սակայն նա անհասանելի է։

«Նովոստի-Արմենիա» գործակալությանը նույնպես չի հաջողվել կապ հաստատել Բագրատյանի հետ։

ՀՀ 7-րդ գումարման Ազգային ժողովում ներկայացված են իշխող խմբակցությունը՝ «Իմ քայլը» (88 մանդատ), ընդդիմադիր խմբակցություններ՝ «Բարգավաճ Հայաստանը» (26 մանդատ) և «Լուսավոր Հայաստանը» (18 մանդատ)։-0-