ԵՐԵՎԱՆ, 30 մարտի./Նովոստի-Արմենիա/. ՀՀ Ազգային ժողովն արտահերթ նիստ է հրավիրել, որի շրջանակում քննարկվում է «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» ՀՀ օրենքում լրացումների կատարումը, որոնցով նախատեսվում է օնլայն վերահսկողության սահմանումը կորոնավիրուսով վարակված քաղաքացիների կոնտակտներին հետևելու նպատակով:
Մասնավորապես, ՀՀ ազգային ժողովն այսօր քննարկում է կառավարության կողմից ներկայացված օրենքների նախագծերի փաթեթը, որով կորոնավիրուսի հետևանքով առաջացած արտակարգ դրության ժամանակ մարդկանց անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության, գաղտնիության իրավունքներին միջամտություն իրականացնելու հնարավորություն է տրվում:
Загружается новость ... "Лево"
Մարտի 30-ի դրությամբ, ՀՀ-ում հաստատվել է կորոնավիրուսով վարակման 482 դեպք: Բուժվել է 30 մարդ, երեք պացիենտ մահացել է:
«Պանդեմիայի տարածման և կանխարգելիչ աշխատանքներ իրականացնելու համար անհրաժեշտություն է առաջացել լրացումներ կատարել Արտակարգ դրության իրավական ռեժիմի մասին ՀՀ օրենքում»,- ԱԺ արտահերթ նիստի ժամանակ ասել է ՀՀ արդարադատության նախարար Ռուստամ Բադասյանը:
Օրենքում նախատեսվող լրացումները ներկայացնելիս նա ընդգծել է, որ անձնական տվյալների հավաքումն ու մշակումը վերաբերում է բացառապես համաճարակի հետևանքով առաջացած արտակարգ դրություն հայտարարելուն:
Ռուստամ Բադասյանը նշել է, որ փոփոխությունները, մասնավորապես, նախատեսում են հաճախորդի տեղորոշում, նշվել է, նաև որ ֆիքսվելու են վերջինիս հեռախոսահամարի հետ ուղիղ կամ միջնորդավորված կապ ունեցող հեռախոսահամարները, հեռախոսային խոսակցություն սկսելու ամսաթիվը:
Ընդ որում Բադասյանը շեշտել է, որ հեռախոսային զանգերի կամ հաղորդագրությունների բովանդակությունը հասանելի չի լինելու ՝ հիշեցնելով, որ տեղեկատվության ապօրինի օգտագործումը հետապնդվում է օրենքով:
«Այս օրենքով չսահմանված նպատակներով տեղեկատվության գտագործման դեպքում, առկա է նաև քրեական պատասխանատվություն՝ 144, 145 և 146 հոդվածներով»,- նշել է նա:
«Առաջարկվում է ներդնել էլեկտրոնային հաղորդակցության միջոցներ և ծրագրեր, այդ էլեկտրոնային հավելվածների միջոցով հնարավոր կլինի ստուգել անձանց առողջության վիճակի մասին տվյալներ, մեկուսացման, ինքնամեկուսացման պահանջներ ներկայացնել. դրա միջոցով իրականացնել որոշակի վերահսկողություն»,- նշել է Բադասյանը:
«Միջազգային փորձը ուսումնասիրվել է, և ուսումնասիրվել է այն երկրների փորձը, որտեղ ժամակակից տեխնոլոգիական միջոցները կիրառվել են և դրա արդյունքը: Եթե համեմատենք այն երկրները, որտեղ կիրառվել են նման միջոցառումներ, օրինակ, մարտի 26-ի դրությամբ Հարավային Կորեայում եղել է 9241 վարակվածության դեպք, մահացել է 131 մարդ, իսկ Իտալիայում 74386 վարակվածության դեպք, մահացության ցուցանիշը կազմել է՝ 7503»,- նշել է Բադասյանը:
Ընդ որում նա ընդգծել է, որ մարդու իրավունքների և հիմնարար ազատությունների պաշտպանության մասին Եվրոպական կոնվենցիայի միջազգային փորձի ուսումնասիրումը թույլ է տալիս գալ եզրահանգման, որ կիրառվող միջոցառումները խտրական չեն մարդու իրավունքների նկատմամբ:
«Այն միջոցառումները, որ կառավարությունն առաջարկում է սույն օրենքների փաթեթի տեսքով ամբողջությամբ իրավաչափ են»,- եզրափակել է նա:
Հայաստանում մարտի 16–ից ապրիլի 14–ը հայտարարվել է արտակարգ դրություն` երկրում կորոնավիրուսի տարածումը կանխելու նպատակով, ինչի կապակցությամբ մարտի 24–ին ժամը 23։59–ից մինչև մարտի 31–ը ժամը 23։59–ը Հայաստանում գործում են քաղաքացիների տեղաշարժման և տնտեսական գործունեության իրականացման նոր սահմանափակումներ։-0-
