ԱՆ–ն կուսումնասիրի «Սլավմեդ» ԲԿ–ում ծննդկանի մահվան դեպքը և մանկաբարձագինեկոլոգիական ծառայության վիճակը

ԵՐԵՎԱՆ, 29 հուլիսի. /Նովոստի–Արմենիա/. Հայաստանի առողջապահության նախարարությունը կուսումնասիրի «Սլավմեդ» ԲԿ–ում հուլիսի 26–ին մահացած ծննդկանի մահվան դեպքը և կենտրոնի մանկաբարձագինեկոլոգիական ծառայության վիճակը, հայտնում է գերատեսչության մամուլի ծառայությունը։

Կինը հուլիսի 26-ին «Սլավմեդ» բժշկական կենտրոնում կեսարյան հատումով երեխա է ունեցել, այնուհետև բարդացած վիճակում տեղափոխվել «Արմենիա» հանրապետական բժշկական կենտրոնի վերակենդանացման և ինտենսիվ թերապիայի բաժանմունք, որտեղ ժամեր անց արձանագրվել է կենսաբանական մահ։

Ըստ հաղորդագրության, ՀՀ առողջապահության նախարար Արմեն Մուրադյանի հրամանով մասնագիտական հանձնաժողովներ է ստեղծվել` ծննդկանի մահվան դեպքի կապակցությամբ։ Հանձնաժողովի աշխատանքը ղեկավարելու է փոխնախարար Սերգեյ Խաչատրյանը։

Հիշեցնենք, որ ապրիլի 28–ին «Սլավմեդ» բժշկական կենտրոնում արդեն մի ծննդկանի մահվան դեպք գրանցվել էր` կրկին հետծննդյան ժամանակահատվածում։ Գլխավոր մանկաբարձ-գինեկոլոգը նախարարին զեկուցել էր, որ 37-ամյա կինը մահացել է հետծննդյան շրջանում:  ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում հարուցվել էր քրեական գործ՝ բժշկական կենտրոնում ծննդկանի մահվան դեպքի առթիվ։

«Նախարարի կողմից տրվել են խիստ հանձնարարականներ մանրամասն և հանգամանալից ուսումնասիրելու դեպքի հետ կապված բժշկական օգնության կազմակերպման գործընթացը»,– ասվում է նախարարության հաղորդման մեջ։

Բացի այդ, նախարարությունից հայտնեցին, որ նշանակվել է դատաբժշկական փորձաքննություն, ինչի ավարտից հետո միայն հնարավոր կլինի գնահատել մահվան պատճառահետևանքային կապը։

Նախարարի մեկ այլ հրամանով ևս մեկ հանձնաժողով է ստեղծվել ուսումնասիրելու և գնահատելու «Սլավմեդ» բժշկական կենտրոնում մանկաբարձագինեկոլոգիական ծառայության վիճակը։ Արմեն Մուրադյանը հանձնարարել է վեր հանել կազմակերպչական և բժշկական օգնության թերությունները և ներկայացնել առաջարկություններ։

«Ժողովուրդ» թերթը գրում է. «Նախօրեին «Սլավմեդ» բժշկական կենտրոնում վիրահատությունից երկու օր անց մահացել է 28-ամյա կին՝ ծննդկան։ «Սլավմեդ» բժշկական կենտրոնն, ինչպես հայտնի է, պատկանում է ԱԺ պատգամավոր Արկադի Համբարձումյանի՝ Դերժավայի Արկադիի ընտանիքին։ Համբարձումյանները հայտնի են ավտոմեքենաների ներկրմամբ զբաղվող «Ալավմոթորս» ընկերությամբ և «Ժողովուրդ» թերթը հայտնում է, որ չի բացառվում, որ կասեցվի ԲԿ-ի ծննդօգնության ծառայությունը կամ գործունեության լիցենզիան ընդհանրապես։ -0-