Ամեն ինչի պատճառը քաղաքականությամբ զբաղվելն է. Նարեկ Կարապետյանը` իր առանձնատան խուզարկությունների մասին
ԵՐԵՎԱՆ, 31 հուլիսի․/Նովոստի-Արմենիա/․ «Ուժեղ Հայաստան» դաշինքի առաջին համար Նարեկ Կարապետյանն անդրադարձել է այսօր վաղ առավոտից իր առանձնատանն իրականացված խուզարկություններին։
«Քաղաքական գործունեությամբ զբաղվող անձանց փաստորեն արգելվում է զբաղվել քաղաքականությամբ։ Ուղղակի ամեն ինչի պատճառը քաղաքականությամբ զբաղվելն է», - ասաց Կարապետյանը լրագրողների հետ զրույցում։
Նրա խոսքով՝ սա արդեն հոբելյանական, հերթական խուզարկությունն էր իրենց տանը։
«Ամեն անգամ նույն պատմությունն է։ Ինչ-որ նախաքննական պրոցեսով է պայմանավորված։ Կան սահմանափակումներ, բայց կարող եմ ասել, որ ինչ-որ բան չեն տարել», - նշեց Կարապետյանը։
Ավելի վաղ հայտնել էինք, որ ուժայինները խուզարկություններ են անցկացնում «Ուժեղ Հայաստան» դաշինքի առաջին համար Նարեկ Կարապետյանի առանձնատանը։
2026 թ.-ի հունիսի 7-ին կայացած խորհրդարանական ընտրությունների արդյունքներով Նարեկ Կարապետյանը պատգամավորական մանդատ է ստացել ընդդիմադիր «Ուժեղ Հայաստան» դաշինքից։
Կարդացեք նաև. Ուժայինները խուզարկություններ են անցկացնում Նարեկ Կարապետյանի առանձնատանը
