ԱԺ-ի միջադեպի մանրամասները և ինչ է կատարվում ԱԺ-ում ծեծկռտուքից հետո (ՎԻԴԵՈ)

ԵՐԵՎԱՆ, 8 մայիսի./Նովոստի-Արմենիա/. ԱԺ-ում քիչ առաջ Էդմոն Մարուքյանի և Սասուն Միքայելյանի միջև բռնված ծեծկռտուքից հետո կրքերը չեն հանդարտվում:

Հիշեցնենք, որ ավելի վաղ ԱԺ-ում «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ թեժ քննարկում էր ընթանում, որը վերածվում է ծեծկռտուքի:

Ստեղծված իրավիճակը «Լուսավոր Հայաստան» խմբակցության պատգամավոր Էդմոն Մարուքյանի՝ «Իմ քայլը» խմբակցության պատգամավոր Բաբկեն Թունյանի հասցեին հնչեցված խոսքերի հետևանքն էր: Մոտենալով ամբիոնին՝ Մարուքյանն ասում է, որ ափսոսում է մի քանի վայրկյանը, որ պետք է անդրադառնա Թունյանին, բայց կխոսի:

«Պարոն Թունյան, որ ամբիոնից սրիկա, բան բառեր եք ասում, դա լարվածություն է առաջացնում, որովհետև մեկը կարա մտածի՝ իրեն եք անդրադառնում, մյուսը կարա մտածի՝ իրեն եք անդրարդառնում, մի արեք տենց բաներ: Անում եք էտ ձևի բաներ»,- ասում է Մարուքյանը: 

Սասուն Միքայելյանն այդ պահին տեղից ինչ-որ բան էր ասում Մարուքյանին և տեսնելով, որ վերջինս չի լսում իրեն, բղավում է. «Լսի, հոպար»:

«Պարոն Միքայելյան, ես ձեզ համար հոպար չեմ: Ի՞նչը կցխես»,-ասում է Մարուքյանն ու իջնում ամբիոնից, իսկ Սասուն Միքայելյանն էլ իր հերթին է մոտենում Մարուքյանին և ծեծկռտուք է սկսվում: Պատգամավորներն իջնում են տեղից ու փորձում հանգստացնել Մարուքյանին ու Միքայելյանին, սակայն սա վերածվում է զանգվածային անկարգության:

Երբ Մարուքյանը վերադառնում է ամբիոնի մոտ ծեծկռտուքից հետո, վերջինս նշում է, որ ինչքան էլ խփեն, ինքը, միևնույնն է, խոսալու է:

«Ով էր, որ եկավ թաքուն մեջքից խփեց»,- հարցնում է նա, ու դիմում Միքայելյանին՝ «Իմ վիզը կտրողը չի ծնվել, հերիք է այստեղ շմայսություն անես»:

Ծեծկռտուքից հետո ԱԺ խոնակ Արարատ Միրզոյանն ընդմիջում է հայտարարում: 

Սակայն միջադեպից հետո կրքերը չեն հանդարտվում: ԶԼՄ-ների տեղեկություններով, ԱԺ խոսնակ Արարատ Միրզոյանի գրասենյակում բազմաթիվ պատգամավորներ են հավաքված, այդ թվում ծեծկռտուքի մասնակիցներ Էդմոն Մարուքյանն ու Սասուն Միքայելյանն, պատգամավորները քննարկում ու պարզաբանում են տեղի ունեցածը: -0-