Վաղվանից կմեկնարկի կորոնավիրուսի դեմ պատվաստման պրոցեսը. նախարարը պարզաբանել է`ով կպատվաստվի AstraZeneca–ով, ով` «Սպուտնիկ V»-ով
ԵՐԵՎԱՆ, 12 ապրիլի./Նովոստի–Արմենիա/. Հայաստանում կորոնավիրուսի դեմ պատվաստումը կսկսվի ապրիլի 13–ին, պատվաստանյութերը բաշխված են տարիքային կատեգորիաներով, ասաց առողջապահության նախարար Անահիտ Ավանեսյանն այսօր ասուլիսի ժամանակ։
Նրա խոսքով, պատվաստումը կսկսվի ապրիլի 13–ից մայրաքաղաքում, իսկ ապրիլի 14–ից` մարզերում, ինչի կապակցությամբ հիմա իրականացվում է պատվաստանյութերի բաշխման գործընթաց։
Նա նշեց, որ վաղվանից կիրականացվի պատվաստում AstraZeneca–ի պատվաստանյութով, այնուհետև` 1–2 օրվա տարբերությամբ` «Սպուտնիկ V» պատվաստանյութով։
Նախարարը նաև հայտնել է, որ Հայաստանում AstraZeneca-ով պատվաստում կթույլատրվի իրականացնել միայն 55 տարեկանից բարձր քաղաքացիներին:
««AstraZeneca պատվաստանյութի օգտագործման ցուցումներով որոշակի փոփոխություններ են կատարվել, և լրացուցիչ ապահովության ու անվտանգության համար կիրառվել է տարիքային սահմանափակում: Մենք ևս մանրակրկիտ ձևով ուսումնասիրել ենք բոլոր մասնագիտական կառույցների կողմից տրված խորհրդատվությունները և որոշում կայացրինք, որ AstraZeneca-ով պատվաստման համար մենք ևս կսահմանենք տարիքային շեմ, պատվաստում կիրականացնենք միայն 55 տարեկանից բարձր քաղաքացիների համար»,-ասաց Ավանեսյանը:
Նախարարը ներկայացրեց, թե ինչու են նման բաժանում արել:
«Որպեսզի բուժաշխատողների համար հստակ և հասկանալի լինեն չափորոշիչները, և մարդիկ չունենան տարընկալումներ, թե ում ինչ պատվաստանյութ պետք է անեն: Եվ քանի որ առաջնահերթություն է հնարավորինս շատ անձանց պատվաստել և հիվանդանալուց զերծ մնալու, անգամ հիվանդանալու պարագայում այն թեթև ընթացքով տանելու հնարավորություն տալ, մենք այսպիսի քաղաքականություն ենք որդեգրել»,-ասաց Ավանեսյանը:–0–
