ԵՐԵՎԱՆ, 22 հունիսի./Նովոստի–Արմենիա/. Նախկին նախագահ Ռոբերտ Քոչարյանը երեքշաբթի ասուլիսի ժամանակ նախազգուշացրել է, որ իշխանությունները գործողությունները կարող են հանգեցնել նոր արտահերթ խորհրդարանական ընտրությունների, ամփոփել է անցած ընտրությունների արդյունքներն ու խոսել է` արդյոք դաշինքի ներկայացուցիչները պատրաստվում են վերցնել մանդատները։
«Ընտրությունների արդյունքները, պետք է խոստովանեմ, որ անսպասելի էին մեզ համար։ Կարծում եմ՝ անսպասելի էին նաև շատ-շատերի համար առաջին հերթին նաև այն պատճառով, որ բոլոր հարցումները ցույց էին տալիս այլ պատկեր։ Մենք ենթադրում էինք, որ, այնուամենայնիվ, եղել են զանգվածային խախտումներ, մենք ակնհայտ տեսել ենք վարչական ռեսուրսի կիրառում և այդ պատճառով մենք դիմելու ենք Սահմանադրական դատարան ընտրությունների արդյունքները քննարկելու համար։ Շտաբների կողմից հավաքագրվում են նյութերը և առաջիկա օրերի ընթացքում կամփոփվեն ու կպատկերացնեն, թե ինչ ծավալի բողոք է լինելու ՍԴ ներկայացնելու համար», – ասաց Քոչարյանը։
Նրա խոսքով, այն մանդատը, որը ստացել է այս իշխանությունը, այս իշխանության նկատմամբ վստահության մանդատ չէ։
«Մեր բոլոր հանդիպումները եղել են և ավելի մարդաշատ, քան իշխանության ներկայացուցիչների հանդիպումները, իմ կարծիքով՝ այստեղ աշխատեց նախկին իշխանությունների վերադարձի գործոնը: Այդ գործոնը էապես ուժեղացրեց այն հանգամանքը, որ երեք նախկին նախագահ ակտիվ մասնակցում էին ընտրություններին, երկուսը՝ ընտրացուցակներ գլխավորելով, երրորդը՝ քարոզարշավներին շատ ակտիվ մասնակցելով։ Մենք չկարողացանք կոտրել այդ հանգամանքը, քանի որ քարոզարշավը շատ կարճ էր, չէինք հասցնում և հատկապես գյուղական համայնքներում շատ քիչ հանդիպումներ ենք ունեցել, և եթե նկատել եք՝ իշխանությունը շատ ավելի մեծ արդյունքներ է գրանցել գյուղական համայնքներում: Սա, իմ տպավորությամբ, ազդեց այնպես, որ մարդիկ ամեն դեպքում վերջին պահին մտահոգություն ունեցան այդ տեսանկյունից և գնացին քվեարկեցին ներկա իշխանությունների օգտին: Սա երևի հեղափոխության վերջին փամփուշտն էր, բայց չեմ կարծում, որ իշխանությունը ճիշտ է գնահատում իրավիճակը։ Չեմ ընդունում այն կարծիքը, թե մենք պարտվել ենք, քանի որ սա խորհրդարանական ընտրություն էր, և պարտվում են նրանք, ովքեր չեն անցնում խորհրդարան», – ասաց Քոչարյանը։
«Մյուս քննարկվող հարցը մանդատների հարցն է. վերցնել, թե չվերցնել մանդատները, մենք դաշինքի ներսում այս հարցի վերջնական որոշումը դեռ չունենք, ես կարող եմ իմ անձնական կարծիքն ասել, որ մենք ստացել ենք մեր պայքարը շարունակելու շատ լուրջ, նոր հնարավորություն, շարունակելու ենք մեր պայքարը, պառլամենտական պայքարը կարող է ուժեղացնել, այլ ոչ թե միայն փոխարինել փողոցային պայքարը, և այս համատեղումը միայն ուժեղացնում է մեր հնարավորությունները», – ասաց Քոչարյանը։
Նրա խոսքով, իշխանության կազմակերպած երեկվա հանրահավաքը ցույց տվեց, որ վերջիններս շարունակելու են նույն ոճով աշխատել և ոչինչ չի փոխվել նրանց մարտավարության մեջ:
«Եթե իրենք շարունակեն նույն ոճով ու վենդետաներով, ներքաղաքական նույն լարվածությամբ, ես որևէ կասկած չունեմ, որ ՀՀ-ն կանգնած է լինելու ևս մեկ արտահերթ ընտրության առաջ: Դա շատ երկար չի տևելու», – ասաց Քոչարյանը։–0–
