Քաղտեխնոլոգը նշել է այն երեք ընդդիմադիր ուժերին, որոնք ՀՀ–ում կկազմեն նոր իշխանություն

ԵՐԵՎԱՆ, 1 հունիսի./Նովոստի–Արմենիա/. «Հայաստան» դաշինքը, «Բարգավաճ Հայաստանն» ու «Պատիվ ունեմ» դաշինքը երեք հիմնական ընդդիմադիր քաղաքական ուժերն են, որոնք մեծ դեր կխաղան Հայաստանում հաջորղ իշխանության ձևավորման գործընթացում։ Նման կարծիք է հայտնել քաղտեխնոլոգ Վիգեն Հակոբյանն ասուլիսի ժամանակ։

«Այդ երեք ուժերը կհայտնվեն ԱԺ–ում` ստանալով անհրաժեշտ քանակի պատգամավորական մանդատներ, որոնք թույլ կտան ձևավորել կոալիցիոն իշխանություն։ Համենայն դեպս, նման փորձեր չեն կարող չլինել», – ասաց նա։

Փորձագետը նշեց, որ գործող իշխանությունը չունի բավարար քանակի ձայներ, որպեսզի միանձնյա ձևավորի իշխանություն, ինչպես նաև չկան պոտենցիալ դաշնակիցներ, որոնց հետ նրանք կկարողանային պայմանավորվել կոալիցիա ստեղծելու մասին։

«Նշված երեք ըւնդդիմադիր ուժերը, կարծում եմ, չունեն նման խնդիր, բոլորն ունեն կոնկրետ ընտրազանգված, նրանք կարող են ձևավորել իշխանություն», – ասաց նա։

Հայաստանում արտահերթ խորհրդարանական ընտրությունները նախատեսված են հունիսի 20–ին։ Ընտրություններին մասնակցում է 22 քաղաքական կուսակցութուն և 4 դաշինք, որոնց ընտրացուցակները և քվեաթերթիկներում գտնվելու կարգն արդեն սահմանվել են ԿԸՀ–ի կողմից։

Նրանց թվում են «Հայաստան» դաշինքը` նախկին նախագահ Ռոբերտ Քոչարյանի գլխավորությամբ (դաշինքում ներառված է Սյունիքի նախկին մարզպետ Վահե Հակոբյանի կողմից ստեղծված «Վերածնվող Հայաստան» կուսակցությունն ու ՀՅԴ–ն), «Պատիվ ունեմ» դաշինքը (դաշինքում ներառված է երրորդ նախագահ Սերժ Սարգսյանի գլխավորած ՀՀԿ–ն ու ԱԱԾ նախկին տնօրեն Արթուր Վանեցյանիգլխավորած «Հայրենիք» կուսակցությունը, Սերժ Սարգսյանն ընտրացուցակում ներառված չէ)։ ԲՀԿ–ի հիմնադիրն ու առաջնորդն է ձեռներեց և պատգամավոր Գագիկ Ծառուկյանը։–0–