ՓՄՁ ներկայացուցիչները ակցիա են կազմակերպել կառավարության շենքի մոտ․ դեմ են հարկային փոփոխություններին և եկամուտների պարտադիր հայտարարագրմանը
ԵՐԵՎԱՆ,13 փետրվարի․/Նովոստի–Արմենիա/․ Հինգշաբթի առավոտյան ՀՀ կառավարության շենքի մոտ կրկին բողոքի ակցիայի էին դուրս եկել փոքր և միջին բիզնեսի ներկայացուցիչները։
Ցուցարարները դեմ են Հարկային օրենսգրքի փոփոխություններին, որոնք նախատեսում են շրջանառության հարկի դրույքաչափի բարձրացում՝ 5%-ից 10%, ինչպես նաև եկամուտների պարտադիր հայտարարագրման համակարգի ներդրում։
Նրանք նշում են, որ 2025 թվականի հունվարի 1-ից ուժի մեջ մտած փոփոխությունը մի քանի անգամ ավելացրել է իրենց հարկային բեռը, ինչի հետևանքով ՓՄՁ ներկայացուցիչները կարող են լուրջ խնդիրների առաջ կանգնել։
Անցած շաբաթ Ազգային ժողովում տեղի ունեցավ հանդիպում ՓՄՁ-ների ներկայացուցիչների և ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանի միջև։ Բիզնեսի ներկայացուցիչները դժգոհ էին հանդիպման արդյունքներից։
Հարկային փոփոխությունների մասին
Հարկային օրենսգրքում կատարված փոփոխությունները նախատեսում են մասնագիտական գործունեության որոշակի ոլորտների հարկային ռեժիմի փոփոխություն՝ անցում կատարելով ավելացված արժեքի հարկի և շահութահարկի համակարգերին։ Ակնկալվում է, որ փոփոխությունների արդյունքում բյուջեն լրացուցիչ կհամալրվի շուրջ 13 մլրդ դրամով։
2025 թվականի հունվարի 1-ից ուժի մեջ մտած փոփոխությունների համաձայն՝ 115 մլն դրամից պակաս տարեկան շրջանառություն ունեցող ՓՄՁ-ները կվճարեն 10% շրջանառության հարկ, եթե իրենց ապրանքները (ծառայությունները) փաստաթղթավորված չեն, իսկ եթե դրանք փաստաթղթավորված են, ապա հարկային դրույքաչափը 1,5%-ից իջեցվում է 1%-ի։
Փորձագիտական հանրության և բիզնեսի ներկայացուցիչները եկել են հստակ եզրակացության՝ այս փոփոխությունները միայն կհանգեցնեն մատուցվող ծառայությունների (հաշվապահներ, իրավաբաններ և որոշ այլ կատեգորիաների) արժեքի մինչև 40%-ով բարձրացման։ Եվ այդ բեռը ուղղակիորեն ընկնելու է քաղաքացիների ուսերին։
