Նախորդ շաբաթվա կարևոր նորությունների հնգյակը (հունվարի 13–17)

ԵՐԵՎԱՆ, 18 հունվարի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (հունվարի 13–17)։

• Հունվարի 17–ին հայտնի դարձավ, որ Երևանի Պարույր Սևակի փողոցի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով: Ավելի ուշ հայտնի դարձան դեպքի մի շարք հանգամանքներ։ Ավելի ուշ ՔԿ–ից տեղեկացրեցին, որ Կուտոյանի մահվան վայրում հայտնաբերվել են 30–40 պարկուճներ ու գնդակներ, հարուցվել է քրեական գործ ինքնասպանությանը հասցնելու հատկանիշներով։

• Հունվարի 14–ին «Զվարթնոց» օդանավակայանում առաջին անգամ վայրէջք կատարեց Ryanair իռլանդական լոուքոսթերի Միլան–Երևան օդանավը, որին օդանավակայանում դիմավորեցին ջրի շիթերով։

• ԱԺ նախկին պատգամավոր, ԵԿՄ նախկին նախագահ Մանվել Գրիգորյանն ազավեց կալանքից: Գրիգորյանի նկատմամբ որպես խափանման միջոց ընտրված կալանքը փոխարինվեց չհեռանալու մասին ստորագրությամբ

• Վերջին շրջանում ակտիվորեն քննարկվում է հանրապետությունում մի շարք ծննդատների փակման հետ կապված իրավիճակը։ ՀՀ առողջապահության նախարար Արսեն Թորոսյանը հիմնավորեց ծննդատների փակման նպատակահարմարությունը։

• Հայ օպերային երգչուհի Ռուզան Մանթաշյանը, որի պատճառով, ինչպես ավելի վաղ հաղորդվում էր, ադրբեջանցի տենոր Յուսիֆ Էյվազովը հրաժարվել է ելույթ ունենալ փետրվարի 7–ին Դրեզդենի ամենամյա օպերային բալի բացման արարողությանը, հերքեց տեղեկատվությունն այն մասին, որ նրան անգամ չեն հրավիրել միջոցառմանը։–0–