ԵՐԵՎԱՆ, 27 սեպտեմբերի./Նովոստի–Արմենիա/. Պատերազմի և կորոնավիրուսի վարակելիության կտրուկ աճի պայմաններում Հայաստանում 2021 թ.-ի համար հատկացված պետպատվերով բուժումների գումարը գրեթե սպառվել է, ասաց առողջապահության նախարարի խորհրդական Յակով Ասատրյանը այսօր կայացած քննարկման ժամանակ:
Նրա խոսքով՝ այս պահին կառավարությունում մոտ 1.2 մլրդ. դրամի նախագիծ է շրջանառվում:
«Մենք առաջիկա ամիսներին, վերջնական հաշվարկներն անելուց հետո, փորձելու ենք ներքին դերաբաշխումներով փակել որոշակի առաջացած խնդիրները, և եթե էլի անհրաժեշտություն առաջանա, համապատասխան հիմնավորումներով, կառավարությանը նորից ներկայացնելու ենք նախագիծ՝ պահուստային ֆոնդից տվյալ ծառայությունների համար գումար հատկացնելու պահանջով»,-ասաց նախարարի խորհրդականը:
Загружается новость ... "Лево"
Յակով Ասատրյանի խոսքով՝ պետպատվերի գումարը հիվանդանոցներին բաշխելու գործը առողջապահության նախարարության պետական առողջապահական գործակալության գործառույթն է։
Առողջապահության նախարարությունից հայտնում են, որ խնդիրը սրվել է, որովհետև նախորդ տարի, հիմնականում, հիվանդանոց էին դիմում պատերազմից ու քովիդից տուժածները, իսկ այս տարի դիմողների թիվն ավելացել է, քանի որ դիմում են նաև ուղեկցող խրոնիկ հիվանդություն ունեցող և սոցիալական հատուկ խմբերում ընդգրկված մարդիկ։
«Խնդիրը համակարգային է, բայց քաղաքացիների տվյալ ծառայություններից ժամանակին օգտվելն ու դրա հասանելիության կազմակերպումը ևս փաստում է, որ մենք ունենք կայացած առողջապահական համակարգ: Այդ ընթացակարգերի համար հսկայական գումարներ են հատկացված: Այսինքն ցանկացած քաղաքացի այդ ամենի մասնիկն է և տեղեկացված է իրեն հասանելի առողջապահական ծրագրերից: Եվ նա գիտի, թե որ պահին ինչպես կարող է օգտվել պետության կողմից հատկացված պետպատվերից»,– ասաց Ասատրյանը:
«Վերջիվերջո, քաղաքացին պետք է հասկանա, որ տարին մեկ անգամ պարտադիր բուժզննման պետք է գնա, այքսինքն ժամանակին իմանա, թե իր մոտ ինչ առողջական խնդիրներ կան և համապատասխան ժամկետներում դիմի և ստանա իրեն հասանելիք օգնությունը: Մեր հասարակության մեջ մի փոքր այլ է»,-ասաց առողջապահության նախարարի խորհրդականը:
Նրա խոսքով՝ հիմնականում քաղաքացին արդեն իսկ իր մոտ առկա խնդրով, որը բավականին լուրջ է, միանգամից դիմում է բուժկենտրոն, ու անհրաժեշտություն է առաջանում հավելյալ բուժզնման:
«Տարվա ընթացքում մենք չգիտենք` ինչ կլինի, ինչ դեպքերի մասով հիմնականում կարող է գումարը ծախսվել: Մենք տարվա մեջ մի քանի անգամ և´ ներքին վերաբաշխումներով, և´ պհուստային ֆոնդից գումարներ ենք հատկացնում առողջապահական հարցերին»,-ասաց Ասատրյանը:
Համաձայն պաշտոնական տվյալների՝ հատկապես սոցիալապես անապահով և հատուկ խմբերում ընդգրկված անձանց բժշկական սպասարկման իրականացման համար պետբյուջեից 2021թ-ի համար հատկացված մոտ 12 մլրդ դրամից մնացել է մոտ 2 մլրդ դրամը: Սա մեծ գումար չէ՝ հաշվի առնելով, որ տարվա ավարտին մոտ 4 ամիս դեռ կա։
«Պետպատվերի շրջանակում այս գումարները գրեթե ամբողջովին սպառվել են Երևանում: Եվ շատ բժշկական կենտրոններում խոցելի խմբերն արդեն իսկ բախվում են բժշկական ծառայություների մատչելիոթյան ու հասանելիության խնդրին», – ասաց Ասատրյանը:
Յակով Ասատրյանը նշեց նաև, որ տարեվերջին համապատասխան փոփոխություններ կլինեն: Պահուստային ֆոնդից, ըստ անհրաժեշտության էլ, ինչպես նախորդ տարիներին, այս տարի ևս հավելյալ գումարներ կհատկացվեն առողջապահական համակարգին:–0–
