ԵՐԵՎԱՆ, 21 մայիսի./Նովոստի–Արմենիա/. «Լուսավոր Հայաստան» խմբակցության նախագահ Էդմոն Մարուքյանը Facebook-յան իր էջում նշել է, որ «Լուսավոր Հայաստան» խմբակցությունը նախաձեռնել է ԱԺ արտահերթ նիստ՝ քննարկելու համար նախորդ օրվա իրադարձությունները։
«Նախաձեռնությանը միացել են նաև Բարգավաճ Հայաստան խմբակցության 18 պատգամավորները։ Համաձայն Իմ քայլը խմբակցության հետ ձեռքբերված նախնական համաձայնության՝ նիստը տեղի կունենա վաղը՝ մայիսի 22-ին, ժամը 11։00-ին», – նշել է Մարուքյանը։
Միաժամանակ «Իմ քայլը» խմբակցության ղեկավար Լիլիթ Մակունցը Facebook–յան իր էջում նշել է, որ «Լուսավոր Հայաստանը» չունի «ԻՄ ՔԱՅԼԸ» խմբակցության նույնիսկ նախնական համաձայնությունը արտահերթ նիստ հրավիրելու վերաբերյալ այն ձևակերպումներով, որոնք առաջարկվել է:
«Այս մասին հեռախոսազրույցում երեկ ասել եմ պարոն Գորգիսյանին («Լուսավոր Հայաստան» խմբակցության պատգամավոր Գևորգ Գորգիսյան, խմբգր.), իսկ քիչ առաջ նաև պարոն Մարուքյանին», – նշել է Մակունցը։
Մայիսի 19–ին ՀՀ վարչապետ Նիկոլ Փաշինյանը հայտարարեց «Հանուն անկախ դատարանների» ակցիայի մեկնարկի մասին և կոչ արեց մայիսի 20–ին ժամը 08։30–ից արգելափակել հանրապետության բոլոր դատարանների մուտքն ու ելքը` խոստանալով ժամը 12։00–ին հանդես գալ հատուկ հայտարարությամբ։ Մայիսի 20–ին ժամը 08։30–ից ակտիվիստներն արգելափակեցին հանրապետության դատարանների մուտքն ու ելքը։ Նույն օրը Փաշինյանը հայտարարեց, որ եկել է դատական համակարգում «վիրահատական միջամտության» ժամանակը, իսկ 13։30–ին կոչ արեց վերացնել դատարանների արգելափակումը։–0–