Կարևոր են ոչ թե քարտեզները, այլ այն իրավական ակտերը, որոնք վավեր են. փոխվարչապետը` հայ–ադրբեջանական սահմանի սահմանազատման մասին
ԵՐԵՎԱՆ, 6 հոկտեմբերի./Նովոստի–Արմենիա/. Հայ–ադրբեջանական սահմանի սահմանագծման և սահմանազատման հարցերում կարևոր են իրավական ակտերը, որոնք վավեր են, իրավազոր են, և որոնց հիման վրա կառուցվել են քարտեզները, այսօր հայտարարեց ՀՀ փոխվարչապետ Մհեր Գրիգորյանը` պատասխանելով պատգամավորի այն հարցին, թե կոնկրետ ինչ քարտեզներ են օգտագործվելու այս գործընթացում։
«Նման գործընթացներում, թե´ նախապատրաստական փուլում, թե´ հետագայում իրականացման փուլում, նախ և առաջ կարևոր են ոչ թե քարտեզները, այլ այն իրավական ակտերը, որոնք վավեր են, իրավազոր են, և որոնց հիման վրա կառուցվել են քարտեզները», – ընդգծեց Գրիգորյանը։
Նրա խոսքով, ամբողջական և համապարփակ իրավական հիմքերի հետազոտությունից հետո նոր պարզ կդառնա, թե սխեմատիկ իմաստով որ քարտեզներն են, որ հիմք են հանդիսանալու գործընթացներ կազմակերպելու և սկսելու համար։
Այս համատեսքստում Գրիգորյանն ընդգծեց, որ հնարավոր չէ սելեկտիվ վերաբերվել գործող և իրավազոր ակտերին: Դրանք պետք է վերլուծվեն ամբողջության մեջ և բոլորն էլ մեկնարկվող գործընթացներում կիրառելի են:
«Այլ հարց է,թե այդ իրավական ակտերի կոնֆլիկտն ինչ տեքս կունենա, իհարկե, մաքսիմալ պետք է հետազոտվեն այն ակտերը, որոնք երկկողմն համաձայնեցված են եղել, որոնց հիման վրա քարտեզագրում է իրականացվել»,-եզրափակեց փոխվարչապետը:–0–
