Հայաստանը կսահմանափակի քաղաքացիների մուտքը մի շարք երկրներից կորոնավիրուսի «օմիկրոն» շտամի պատճառով

ԵՐԵՎԱՆ, 29 նոյեմբերի./Նովոստի–Արմենիա/. Կորոնավիրուսի նոր՝ «Օմիկրոն» շտամով պայմանավորված՝ մի շարք երկրներից Հայաստան մուտքը կսահմանափակվի, հայտարարեց ՀՀ առողջապահության նախարար Անահիտ Ավանեսյանն այսօր ասուլիսի ժամանակ։


«Հայտնաբերվում են նոր շտամեր, որոնք նախորդներից տարբերվում են իրենց տարածման ակտիվությամբ: Վերջին ենթատեսակը, որի տարածումը սկսվել է Հարավաֆրիկյան Հանրապետությունից, կոչվում է Օմիկրոն: Դրա մուտացման աստիճանը բավականին մեծ է: Ցավոք սրտի, տվյալ վիրուսը 50 մուտացիա է կրում», – նշեց նա։

Նախարարի խոսքով,  Հայաստանում նախատեսվում է ներդնել մուտքի ժամանակավոր արգելք մի շարք աֆրիկյան երկրներից` ՀԱՀ–ից, Բոտստվանայից, Լեսոթոյից, Նամիբիայից, Զիմբաբվեից, Մոզամբիկից, Մադագասկարից և Տանզանիայից։

«Այսօր կանցկացվի միջգերատեսչական հանձնաժողովի նիստ, որի ժամանակ կքննարկվեն Առողջապահության նախարարության առաջարկները, և օրվա վերջում արդեն կհստակեցվի նոր սահմանափակումների ցանկը», – ասաց Ավանեսյանը։–0–