Անչափահասին գիրքը ոչ ոք չի տվել, ինքն է գտել. Նելլի Դուրյանն` աղմկահարույց միջադեպի մասին (ՎԻԴԵՈ)

ԵՐԵՎԱՆ, 27 մայիսի./Նովոստի–Արմենիա/. ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ, ոստիկանության գնդապետ Նելլի Դուրյանը Facebook–յան իր էջում գրառում է կատարել՝ անդրադառնալով նախօրեին տարածված տեղեկատվությանն այն մասին, որ փողոցում երեխաներին օրգազմի մասին գրքեր են բաժանում:

Հիշեցնենք, որ օրերս համացանցում տեսանյութ է հրապարակվել օգտատեր Դավիթ Աթանեսյանի կողմից, որտեղ նա հայտնում է, որ Երևանի Կոմիտաս վարչական շրջանի Վրացական փողոցում «Օրգազմը Ձեզ համար կամ Դուք օրգազմի համար» վերնագրով գրքեր են բաժանել երեխաներին, այդ թվում՝ իր 9-ամյա որդուն: Նա տեղեկացրել է, որ այդ գրքույկը բակում խաղացող բոլոր երեխաներին բաժանել է ինչ որ անծանոթ կին: Տեսանյութում տղամարդը պահանջում է չպղծել երեխաներին։

«Facebook սոցիալական կայքում Դավիթ Աթանեսյան օգտատերը տեղադրել էր տեսանյութ, որտեղ ասվում էր, որ իր 9 տարեկան որդուն և բակում խաղացող երեխաներին է մոտեցել մի անծանոթ կին և բաժանել սրբապղծություն տարածող գրքեր։ ՀՀ ոստիկանության անչափահասների գործերով եւ ընտանեկան բռնության դեմ պայքարի ստորաբաժանման ծառայողները վերոհիշյալ նյութի հետքերով ստուգումներ և պարզաբանումներ են իրականացրել, ոստիկանության Արաբկիրի բաժին է հրավիրվել «Facebook» սոցիալական կայքի օգտատերը՝ անչափահաս որդու հետ», – նշել է Դուրյանն` ավելացնելով, որ զրույցի ընթացքում տղան նշել է, որ գիրքն իրեն ոչ ոք չի տվել, այլ այն գտել է շենքի հարևանությամբ գտնվող խոտածածկ տարածքից, և մատնացույց է արել վայրը, որտեղից գտել է գիրքը։

«Ոստիկանության Արաբկիրի բաժնում փաստով նախապատրաստվում են նյութեր», – նշված է Դուրյանի գրառման մեջ։–0–