Ադրբեջանն այս պահին ինտենսիվ կրակում է Գեղարքունիքի Կութ և Նորաբակ գյուղերի ուղղությամբ․ՄԻՊ

ԵՐԵՎԱՆ, 16 օգոստոսի/Նովոստի-Արմենիա/․ Ադրբեջանական զինված ուժերն այս պահին ուղիղ նշանառությամբ կրակում են Գեղարքունիքի մարզի Կութ գյուղի վրա: Ուղիղ կրակում են նաև Նորաբակ գյուղի վրա, հաղորդում է ՀՀ մարդու իրավունքների պաշտպան Արման Թաթոյանը: 

«Կրակոցները ինտենսիվ են ու տարբեր տրամաչափի զինատեսակներից: Բնակիչները փորձում են պատսպարվել», - նշում է Թաթոյանը: 

Ադրբեջանական զինված ուժերի այս արարքները հանցավոր են, ուղիղ դիտավորությամբ ուղղված են մարդկանց կյանքից զրկելուն, խաթարում են մարդկանց անվտանգությունն ու խաղաղությունը:

Ադրբեջանն այսօր երեկոյան կրակ է բացել Գեղարքունիքի հատվածում, ինչի հետևանքով 19-ամյա զինծառայող է մահացել։ Այսօր Ադրբեջանը սադրանքի է դիմել նաև Երասխի հատվածում, ինչի հետևանքով 46–ամյա զինծառայող է մահացել։ Գիշերն Ադրբեջանը փորձել է դիրքային առաջխաղացում ապահովել Սյունիքի մարզի` Սև լճի հատվածում, բայց հայ դիրքապահների գործողությունների արդյունքում հետ է շպրտվել` կրելով կորուստ։–0–