Ադրբեջանական հաքերական գրոհների հետքերով. իրավիճակին արձագանքել է վարչապետի մամուլի խոսնակը

ԵՐԵՎԱՆ, 4 օգոստոսի./Նովոստի–Արմենիա/. Տեղեկատվական անվտանգության փորձագետ Սամվել Մարտիրոսյանն այսօր տեղեկացրել էր, որ ադրբեջանական հաքերները հայտնում են, որ կարողացել են ներթափանցել կառավարական ներքին ցանց և տանել 55 տերաբայթ տեղեկատվություն։

Ավելի ուշ Մարտիրոսյանը Facebook–յան իր էջում հայտնեց, որ բաց տեսքով հրապարակվել են 103 մահվան վկայական։

«Էս անգամ, արդարադատության նախարարությունից ինչ-որ արտահոսք ա։ 2019 թվականի փաստաթղթեր են», – նշել է նա։



Իրավիճակին արձագանքել է վարչապետի մամուլի խոսնակ Մանե Գևորգյանը։

«Հաշվի առնելով լրատվամիջոցների ներկայացուցիչների մեծ հետաքրքրությունը այն տեղեկության վերաբերյալ, որ «ադրբեջանական հաքերային հարձակման» հետեւանքով ՀՀ կառավարության սերվերների ղեկավարման համակարգից կորզվել է մեծածավալ տեղեկատվություն, հայտնում եմ հետևյալը. ՀՀ ԱԱԾ կողմից իրականացված աշխատանքների ընթացքում պարզվել է, որ համացանցում շրջանառվում է ՀՀ կառավարության սերվերների ղեկավարման համակարգի աշխատանքային գործընթացը պատկերող համակարգչային էկրանի լուսապատճենը (screenshot)։ Սա սակայն չի վկայում 55 տերաբայթ ծավալով տեղեկատվության կորզման մասին», – նշել է նա` ավելացնելով, որԱԱԾ-ն շարունակում է աշխատանքները նշված լուսապատճենի ծագումը պարզելու և պետական սերվերներ ներթափանցելու մասին տեղեկությունը ստուգելու ուղղությամբ։

Նշենք, որ սա վերջին մի քանի ամսում գրանցված առաջին դեպքը չէ, երբ ադրբեջանցի հաքերները հայտարարում են, որ կոտրել են հայկական ռեսուրսներ և տարել տվյալներ, որոնք հրապարակում են համացանցում։

Ավելի վաղ Մարտիրոսյանը զգուշացրել էր, որ սոցցանցերում տարածվում է վտանգավոր սփամ, որի միջոցով հասարակ օգտատերերը նպաստում են հայկական կայքերի վրա կազմակերպվող գրոհներին։ Նրա խոսքով, հայկական ԶԼՄ–ների վրա DDoS գրոհները կազմակերպվել են Ադրբեջանի հատուկ ծառայությունների կողմից։–0–