ԱԺ–ն առաջին ընթերցմամբ ընդունեց ԵՄ-ին Հայաստանի անդամակցության գործընթացի մեկնարկի օրինագիծը
ԵՐԵՎԱՆ, 12 փետրվարի․/Նովոստի–Արմենիա/․ Այսօր կայացած նիստում ՀՀ ԱԺ–ն առաջին ընթերցմամբ հավանություն է տվել ԵՄ-ին Հայաստանի անդամակցության գործընթացի մեկնարկի օրինագծին։
Այն ընդունվել է իշխող «Քաղաքացիական պայմանագիր» խմբակցության ձայների շնորհիվ, քանի որ ընդդիմադիր «Հայաստան» խմբակցությունը չի մասնակցել քվեարկությանը, իսկ «Պատիվ ունեմ» խմբակցությունը դեմ է քվեարկել։
ԵՄ-ին Հայաստանի անդամակցության գործընթացի մեկնարկի մասին
2025 թվականի հունվարի 9-ին ՀՀ կառավարությունը հավանություն է տվել «Ժողովրդավարական ուժերի հարթակի» (այն ներառում է 4 արտախորհրդարանական կուսակցություն և մի քանի քաղաքացիական շարժումներ) համակարգած «Եվրաքվե» քաղաքացիական նախաձեռնության կողմից առաջարկված ԵՄ-ին Հայաստանի անդամակցության նախագծին։ Նախագիծը խորհրդարանի քննարկմանը ներկայացնելու համար Եվրաքվեի ակտիվիստները հավաքել են Հայաստանի քաղաքացիների ավելի քան 52 հազար ստորագրություն։
Հունվարի 24-ին ՀՀ Ազգային ժողովի եվրաինտեգրման խորհրդարանական հանձնաժողովը դրական եզրակացություն է տվել այս օրինագծին։
Ինչպես հայտարարել է ՀՀ վարչապետ Նիկոլ Փաշինյանը, Հայաստանը կարող է դառնալ ԵՄ անդամ միայն այն դեպքում, եթե ժողովուրդը հավանություն տա այս նախաձեռնությանը հանրաքվեի միջոցով։ Նա մատնանշել է ԵՄ-ի հետ համատեղ ճանապարհային քարտեզի քննարկման և մշակման անհրաժեշտությունը։
