ԱԱԾ տնօրենի տեղակալը մանրամասնել է՝ երբ կավարտվի սահմանապահների համար տնակների տեղադրումը
ԵՐԵՎԱՆ, 1 նոյեմբերի./Նովոստի–Արմենիա/. Սահմանապահների համար տնակների տեղադրումն ամբողջությամբ կավարտվի մինչև նոյեմբերի վերջ:
«Արմենպրես»-ի հաղորդմամբ՝ այս մասին վստահեցրել է ԱԱԾ տնօրենի տեղակալ Արամ Հակոբյանն ԱԺ պաշտպանության և անվտանգության ու Ֆինանսավարկային և բյուջետային հարցերի մշտական հանձնաժողովների համատեղ նիստում՝ բյուջետային քննարկումներում:
Տնտեսական հարցերի հանձնաժողովի նախագահ Գևորգ Պապոյանը, անդրադառնալով բյուջեի նախագծին, նախ հետաքրքրվել է, թե ինչո՞վ է պայմանավորված ծրագրում դեղորայքի ավելացումը:
«Իրավիճակից ելնելով՝ հարավային սահմանը հետ է քաշվել, կանգնած է Սյունիքի տարածքում, և այնտեղ
ներգրավված են ժամկետային զինծառայողներ, որը նախկինում մենք չենք ունեցել: Բավականին մեծ քանակությամբ ժամկետային զինծառայողներ են: Այդ իսկ պատճառով մենք ավելացրել ենք դեղորայքի գնման գումարը, որ կարողանանք ապահովել», – ասել է Հակոբյանը:
Նա, անդրադառնալով պայմաններին, որում իրականացվում է ծառայությունը, ասել է. «Պայմաններ դեռ չունենք: Կառուցվում են նոր ուղեկալներ: Մոտ ապագայում դրանք պատրաստ կլինեն, որից հետո կունենանք լավ պայմաններ: Այս պահին ապրում են տնակներում, ծառայությունն իրականացնում են բաց տարածքներում»:
ՔՊ-ից Արմեն Խաչատրյանը նկատել է, որ Գորիս-Որոտան հատվածում կան սահմանապահ զորքերի հենակետեր, ուղեկալներ, բայց խնդիր կա տնակների, կացարանների մասով: «Մեր սահմանապահները, ինչքանով, որ տեսնում ենք, այնքան էլ ապահովված չեն այդ կացարաններով, տնակներով: Գիտեմ, որ միջոցառումներ են իրականացվում այդ ուղղությամբ», – ասել է նա ու հետաքրքրվել արդյունքներով:
Հակոբյանը պատասխանել է. «Մինչև նոյեմբերի վերջ մենք կվերջացնենք բոլոր տնակների տեղադրման հարցը: Այս պահին 99 տոկոսով կատարված է, տնակների մեջ են մեր զինծառայողները: Մեկ հատ անցյալ շաբաթ ենք տեղադրել Որոտանի ճանապարհի վրա: Մեկ տեղ է մեզ մնացել վրան, ինչը կվերացնենք, մինչև նոյեմբերի վերջ բոլորն ապահովված կլինեն տնակներով»:
Նա հավելել է, որ վերջերս է վերադարձել Սյունիքից՝ նշելով, զինծառայողները ճիշտ է շատ դժվարին պայմաններում են ծառայում՝ եղանակային պայմաններով պայմանավորված, բայց բավականին ապահովված են և սնունդով և հանդերձանքով: Բայց ԱԱԾ տնօրենը հանձնարարել է էլ ավելի շատ ուշադրություն դարձնել, մինչև կլինի նոր ուղեկալների կառուցման վերջը:–0–
