Նախորդ շաբաթվա կարևոր նորությունների հնգյակը

ԵՐԵՎԱՆ, 17 փետրվարի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։

• Արմեն Սարգսյանը համաձայնել է դառնալ ՀՀ նախագահի ՀՀԿ թեկնածուն։

• Փետրվարի 16–ին Հայաստանը ցնցվեց սահմռկեցուցիչ միջադեպից։ Երևանի Դավիթաշենի կամրջի տակ հայտնաբերվեցին մոր և աղջկա դիեր։ Մայրը 37 տարեկան էր, դուստրը` 9–ը։ Հայտնի դարձավ նաև, որ նրանք երեք օր է որոնվում էին որպես անհետ կորած։ Միաժամանակ տեղեկություն տարածվեց, որ 37–ամյա կինն աշխատում էր ՀՀ ԱԻՆ–ում «Սեյսմիկ պաշտպանության արևմտյան ծառայություն» ՊՈԱԿ-ում։ Քննչական կոմիտեն հարուցեց քրեական գործ միանգամից երկու հոդվածներով` սպանություն և ինքնասպանությանը հասցնելը։ Ավելի ուշ ՔԿ–ն մանրամասներ հաղորդեց։

• «Արսենալի» կիսապաշտպան Հենրիխ Մխիթարյանը դարձավ երկու գոլային փոխանցման հեղինակ Եվրոպա լիգայի 1/16 եզրափակչի շրջանակում կայացած «Էստերսունդ» – «Արսենալ» խաղում` ճանաչվելով խաղի լավագույն ֆուտբոլիստ։ Միաժամանակ ֆուտբոլիստը մեկնաբանել է տարած հաղթանակը ու կիսվել տպավորություններով։

• Փետրվարի 13–ին ծեծկռտուք էտեղի ունեցել Երևանի ավագանու խորհրդի նիստում։ «Երկիր Ծիրանի» կուսակցության անդամ Մարինա Խաչատրյանը կոյուղու ջուր էր բերել հետը նիստին` ցանկանալով այն փոխանցել Տարոն Մարգարյանին։ Այս կերպ նա փորձում էր հնչեցնել Նուբարաշենի կոյուղաջրերի խնդիրը։ ՀՀԿ խմբակցության ներկայացուցիչները խոչընդոտեցին դրան և փորձեցին խանգարել ընդդիմադիրներին փոխանցել կեղտաջուրը քաղաքապետին։ Այդ պահին Տարոն Մարգարյանն ընդմիջում հայտարարեց, որի ընթացքում Ավագանու խորհրդի անդամների միջև ծեծկռտուք սկսվեց։ Ավելի ուշ Երևանի քաղաքապետարանը հանդես եկավ հայտարարությամբ `խստորեն դատապարտելով տեղի ունեցածը։ Միաժամանակ հայտնի դարձավ, որ ծեծկռտուքից հետո «Նուբարաշեն» ՔԿՀ տարածքում նորոգման աշխատանքներ են սկսվել։

• ԱՄՆ ազգային հետախուզության տնօրեն Դենիել Քոութսը հայտարարել է, որ Ղարաբաղի շուրջ Ադրբեջանի և Հայաստանի միջև լարվածությունը կարող է 2018 թ.–ին վերածվել մասշտաբային ռազմական կոնֆլիկտի։–0–