Հանգստյան օրերի առավել ուշագրավ նորությունները

ԵՐԵՎԱՆ, 2 մայիսի. /Նովոստի–Արմենիա/. «Նովոստի–Արմենիա» գործակալությունը  ներկայացնում է հանգստյան օրերի առավել ուշագրավ նորությունների սեփական տարբերակը։

• Ապրիլի 30–ի գիշերը Արցախի ՊԲ երկու զինծառայող է զոհվել հակառակորդի կողմից կրակի դադարեցման պայմանավորվածության խախտման հետևանքով։

• Մայիսին Ստոկհոլմում անցկացվելիք «Եվրատեսիլ 2016» երգի միջազգային մրցույթի կազմակերպիչները ներողություն են խնդրել փաստաթղթի հրապարակման համար, որտեղ թվարկվել են միջոցառմանն արգելված դրոշները: «Եվրատեսիլ 2016»-ին արգելել են Լեռնային Ղարաբաղի, Պաղեստինի, Կոսովոյի, Հյուսիսային Կիպրոսի թուրքական հանրապետության, Բասկերի երկրի, Մերձդնեստրի, Դոնեցկի Ժողովրդական Հանրապետության, Իսլամական պետության դրոշները, ինչպես նաև ղրիմ-թաթարական դրոշը:
  

• ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում հարուցվել է քրեական գործ՝ բժշկական կենտրոնում ծննդկան Ն.Մուսայելյանի մահվան դեպքի առթիվ։

• ՀՀ փոխարտգործնախարար Շավարշ Քոչարյանը հայտարարել է, որ հայկական կողմերը դեմ չեն ղարաբաղյան խնդրի փուլային լուծմանը մի շարք պայմանների դեպքում, մասնավորապես, եթե Ադրբեջանը ճանաչի Լեռնային Ղարաբաղի Հանրապետության անկախությունը։

• ՀՀ պաշտպանության նախարար Սեյրան Օհանյանը զինված ուժերի ժամկետային զինծառայող, ականանետի նշանառու, շարքային Հարություն Բադալյանին է հանձնել Հայրենիքի պաշտպանության ու անվտանգության ապահովման գործում ցուցաբերած բացառիկ արիության, անձնուրացության ու հմտության համար ՀՀ նախագահ Սերժ Սարգսյանի հրամանագրով նրան շնորհված «Մարտական խաչ» երկրորդ աստիճանի շքանշանը։-0-