Երեքշաբթի` ապրիլի 19–ի գլխավոր նորությունները

ԵՐԵՎԱՆ, 20 ապրիլի./Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` ապրիլի 19–ի ամենահետաքրքիր նորությունների սեփական տարբերակը։

• ՀՀ նախագահ Սերժ Սարգսյանը և ԼՂՀ նախագահ Բակո Սահակյանը երեքշաբթի ԼՂՀ-ում այցելել են Պաշտպանության բանակի զորամասերից մեկը և պետական պարգևներ հանձնելմի խումբ զինծառայողների ապրիլի 2-5-ը ընկած ժամանակահատվածում հակառակորդի սանձազերծած ռազմական գործողությունների ընթացքում ԼՂՀ պետական սահմանը պաշտպանելիս ցուցաբերած արիության ու խիզախության համար։
  

• Ամերիկահայ հայտնի գրող և բանաստեղծ Փիթեր Բալաքյանն արժանացել է Պուլիցերյան մրցանակի «Պոեզիա» անվանակարգում։ Բալաքյանը մրցանակը ստացել է «Օզոնային օրագիր» պոեմի համար։ Պուլիցերյան մրցանակի դափնեկիրների հայտարարման 100–րդ արարողությունն անցկացվել է նախօրեին Կոլումբիայի համալսարանում։

• Երևանը պաշտոնապես հաստատել է, որ ՀՀ արտգործնախարար Էդվարդ ‪Նալբանդյանի հրավերով ապրիլի 21-22-ը Հայաստան պաշտոնական այց կկատարի ՌԴ արտաքին գործերի նախարար Սերգեյ ‪Լավրովը։

• Travel.ru զբոսաշրջային ծառայությունը, ներկայացնելով ԱՊՀ երկրներում զբոսաշրջիկների համար ճանաչում վայելող հանգստի ուղղությունների ուսումնասիրման արդյունքները, Աևանա լիճն ընդգրկել է ԱՊՀ երկրների զբոսաշրջիկների շրջանում ամենաճանաչված հանգստավայրերի լավագույն հնգյակում։

• Եվրահանձնաժողովի ղեկավար Ժան Կլոդ Յունկերը, Եվրոպայի Խորհրդի Խորհրդարանական Վեհաժողովի նիստի ժամանակ ելույթ ունենալիս կոչ է արել Ադրբեջանին դադարեցնել գնդակոծությունները ղարաբաղյան հակամարտության գոտում:

• Հայտնի է դարձել ՄԱԿ-ի գլխավոր քարտուղար Պան Գի Մունի հայաստանյան այցի օրը: Պան Գի Մունը կայցելի Երևան ապրիլի 25-ին տարածաշրջանային այցի շրջանակում։ Նա կայցելի նաև Վրաստան և Ադրբեջան։

• Հայազգի բարերար և ձեռնարկատեր Լևոն Հայրապետյանի պաշտպանության ակցիայի մասնակիցները Հայաստանում ՌԴ դեսպանատան աշխատակցին նամակ են փոխանցել, որում պահանջում են փոխել Հայրապետյանի նկատմամբ կիրառված խափանման միջոցը։ Հայրապետյանին մոսկովյան դատարանը խարդախության մեղադրանքով դատապարտել է 4 տարի ազատազրկման:

• Եվրոպայի խորհրդի խորհրդարանական վեհաժողովն ապրիլի 19-ին 44 պատվիրակների ստորագրությամբ ընդունեց Լեռնային Ղարաբաղի հակամարտության խաղաղ կարգավորման թիվ 603 գրավոր բանաձևը: Փաստաթղթի հեղինակները կոչ են անում հարգել Մինսկի խմբի համանախագահների մշտական կոչերը, սատարել նրանց մանդատի և չբարդացնել շարունակվող բանակցությունները:–0–