Լևոն Հայրապետյանի պաշտպանության ակցիայի մասնակիցները ՌԴ դեսպանատանը նամակ են փոխանցել

ԵՐԵՎԱՆ, 19 ապրիլի. /Նովոստի-Արմենիա/. Հայազգի բարերար և ձեռնարկատեր Լևոն Հայրապետյանի պաշտպանության ակցիայի մասնակիցները Հայաստանում ՌԴ դեսպանատան աշխատակցին նամակ են փոխանցել, որում պահանջում են փոխել Հայրապետյանի նկատմամբ կիրառված խափանման միջոցը։

Հայրապետյանին մոսկովյան դատարանը  խարդախության մեղադրանքով դատապարտել է 4 տարի ազատազրկման:

Ինչպես հայտնեց «Նովոստի-Արմենիա» գործակալության թղթակիցը դեպքի վայրից, ոստիկանությունը թույլ չի տվել, որպեսզի «Ազատությու´ն Լևոն Հայրապետյանին», «Ո´չ, թյուրիմածությանը: Ազատությու´ն Լևոն Հայրապետյանին» պաստառներով ցուցարարները մոտենան ռուսական դեսպանատան շենքին, ակցիայի միայն երկու մասնակիցներին թույլ տվեցին պահանջներով նամակը փոխանցել դեսպանատան աշխատակցին:

Դրանից հետո կազմակերպիչները կոչ արեցին հավաքվածներին ցրվել` խոստանալով սոցցանցերի և ԶԼՄ–ների միջոցով տեղեկացնել իրավիճակի հետագա զարգացման մասին:

Ավելի վաղ «Ազատությու´ն Լևոն Հայրապետյանին» հասարակական նախաձեռնությունը բաց նամակ էր հղել ՌԴ նախագահ Վլադիմիր Պուտինին` կոչ անելով փոխել Հայրապետյանի նկատմամբ կիրառված խափանման միջոցը:

Նամակի հեղինակները հիշեցնում են Հայրապետյանի ծանր առողջական վիճակի մասին, ով ամենօրյա բժշկական խնամքի կարիք ունի: Նրանք նշում են, որ Հայրապետյանը ռուսական պետության նկատմամբ մեծ վաստակներ ունի` լինելով Ռուսաստանի մշակութային և սոցիալական ոլորտների հարյուրավոր բարեգործական ծրագրերի նախաձեռնողը: -0-