Հայկական դեսպանությունների կայքերը ենթարկվել են ցանցահենների զանգվածային գրոհի

ԵՐԵՎԱՆ, 20 հունվարի. /Նովոստի-Արմենիա/. Հայկական դեսպանությունների և մշտական ներկայացուցչությունների կայքերն ամբողջ աշխարհով ենթարկվել են ադրբեջանցի ցանցահենների զանգվածային գրոհի, հայտնում է տեղեկատվական անվտանգության փորձագետ Սամվել Մարտիրոսյանն իր կայքում։

«Ադրբեջանական հաքերները շարունակում են հունվարի 20֊ին նվիրված գործողությունները։ (1991 թվականի Բաքվի հայկական ջարդերի տարելից` «ԱՌԿԱ»)։  Այս պահին ադրբեջանական պատկերները կայքերից հեռացված են, փաստացի, այս պահին ոչ մի դեսպանատան կայք չի աշխատում», – գրել է նա։

Մարտիրոսյանն իր էջում ներկայացրել է հայկական դեսպանությունների 46 կոտրած կայքերի ցուցակն ամբողջ աշխարհով մեկ` այդ թվում, ԱՄՆ–ում, Ռուսաստանում, Արգենտինայում, Ավստրիայում, Բելառուսում, Բրազիլիայում, Բուլղարիայում, Կանադայում, Չինաստանում, Չեխիայում, Դանիայում, ԱՄԷ–ում, Ֆրանսիայում, Վրաստանում, Գերմանիայում, Հունաստանում, Վատիկանում, Հնդկաստանում, Իրաքում, Իտալիայում, Ճապոնիայում, Ղազախստանում, Քուվեյթում, Լիբանանում, Լիտվայում, Նիդեռլանդներում, Լեհաստանում, Ռումինիայում, Իսպանիայում, Շվեյցարիայում, Շվեդիայում, Թուրքմենստանում, Մեծ Բրիտանիայում, Ուկրաինայում, Եգիպտոսում։

Ցուցակում ընդգրկվել են նաև Եվրոպայի խորհրդի, Եվրամիության, ԵԱՀԿ, ՆԱՏՕ–ի և ՄԱԿ–ի հայկական մշտական ներկայացուցչությունների կայքերը։