ԵՐԵՎԱՆ, 11 նոյեմբերի. /Նովոստի–Արմենիա/. Հայաստանում բջջային հեռախոսահամար է վաճառվել ջիփ մեքենայի գնով, հաղորդում է
telecom.arka.am–ը։
Ucom հեռահաղորդակցական ընկերությունը նոյեմբերի 9–ից սկսել է «044» նոր կոդով բջջային կապի հեռախոսահամարների վաճառքը, իսկ մինչ այդ ընկերությունը կազմակերպել էր «գեղեցիկ» համարների ավանդական էլեկտրոնային աճուրդ, որոնց վաճառքից ստացված եկամուտն ուղղվելու է բարեգործական նպատակներով։
Աճուրդի արդյունքներիզ պարզ է դառնում ամենաբարձր գինն առաջարկվել է (+374) 44 00 00 00 «գեղեցիկ» համարի համար։ Ապագա սեփականատերը այդ հեռախոսահամարի համար կվճարի 15 մլն դրամ։ Առաջարկված գումարի չափով երկրորդը (+374) 44 77 77 77 հեռախոսահամարն է, որի համար կվճարվի 10 մլն դրամ։
Միաժամանակ, աճուրդի մասնակիցների առաջարկած ամենացածր գինը 550 հազար դրամն է (+374) 44 01 11 11 հեռախոսահամարի համար։
Աճուրդի ընթացքում վաճառվել է 33 հատուկ «գեղեցիկ» համարներ նոր կոդով։ Աճուրդի արդյունքներով, այս պահին 044.ucom.am կայքում հրապարակված է 104 մլն 900 հազար դրամ թիվը։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ -0-
