ԵՐԵՎԱՆ, 26 հոկտեմբերի. /Նովոստի–Արմենիա/. ՀՀ Տավուշի մարզի Ներքին Կարմիրաղբյուր գյուղի բնակիչ, ՀՀ ԶՈւ ռազմական ոստիկանության աշխատակից Արթուր Առաքելյանի կողմից նախօրեին գտնված վիրավոր անգղին ցուցաբերվել է անհրաժեշտ բուժօգնություն, սակայն նրա ճախրելու հավանականությունը զրոյական է, հաղորդում է ՀՀ բնապահպանության նախարարության մամուլի ծառայությունը։
Սկզբում Առաքելյանը թռչունին տեղափոխել է իր բնակարան։ ՀՀ բնապահպանության նախարար Արծվիկ Մինասյանի և ՀՀ ԶՈւ ռազմական ոստիկանության Տավուշի բաժնի պետ Ա. Ղազարյանի միջև ձեռք բերված պայմանավորվածության արդյունքում` վիրավոր թռչունը տեղափոխվել է Երևանի կենդանաբանական այգի։
«Սպիտակագլուխ անգղը հոկտեմբերի 26-ի գիշերը տեղափոխվել է Երևանի կենդանաբանական այգու կենդանիների բուժսպասարկման կենտրոն։ Մասնագետները, որոնց թվում եղել է նաև Ֆինլանդիայից ժամանած անասնաբույժը, նախնական զննում են իրականացրել», – նշվում է հաղորդագրության մեջ։
Ցավազրկողի ներարկումից հետո իրականացվել է նաև ռենտգեն հետազոտություն: Թռչնի զննության, այդ թվում ռենտգեն ախտորոշման արդյունքում պարզվել է, որ թռչունն ունի աջ թևի կոտրվածքներ, այդ վիճում գտնվել է մոտ 20 օր, ինչը դարձել է հյուծվածության պատճառ:
Նախնական տվյալներով` անգղի մոտ հրազենային վնասվածքներ առկա չեն:
Անգղի վիճակի մասին լիարժեք եզրակացություն հնարավոր կլինի տալ վերականգնողական գործընթացի ընթացքում:
Այս պահին թռչնի առողջական վիճակում նկատվում է դրական տեղաշարժ, սակայն մասնագետների փոխանցմամբ` նման կոտրվածքների դեպքում թռչելու հավանականությունը զրոյական է:
Սպիտակագլուխ անգղը վտանգված տեսակ է: Գրանցված է նախկին ԽՍՀՄ և Ռուսաստանի Կարմիր գրքերում: Տեսակն ընդգրկված է ԲՊՄՄ Կարմիր ցուցակում (ver. 3.1) «Least Concern» կարգավիճակով: ԲՊՄՄ Կարմիր ցուցակի չափորոշիչներով գնահատվում է որպես «Խոցելի»` VU D1: Ընդգրկված է նաև Հայաստանի Կարմիր գրքում: ՀՀ-ում տարածված է խոշոր ժայռագոյացություններով լեռնազանգվածներում՝ Սյունիքի մարզ, Տավուշի մարզ, Լոռու մարզ:–0–
