ԵՐԵՎԱՆ, 11 դեկտեմբերի. /Նովոստի–Արմենիա/. ՀՀ նախկին նախագահ Ռոբերտ Քոչարյանի աջակիցները պահանջեցին գլխավոր դատախազի և Քոչարյանի կալանքի հետ կապ ունեցող մի շարք պաշտոնատար անձանց հրաժարականը։
Վերաքննիչ դատարանը 10 օր քննում էր Գլխավոր դատախազության միջնորդությունը` Քոչարյանին ազատ արձակելու մասին որոշումը չեղարկելու վերաբերյալ: Նիստի ժամանակ փաստաբանները ներկայցրել են մի շարք միջնորդություններ, մասնավորապես, դատավոր Ռուբեն Մխիթարյանի ինքնաբացարկի մասին։ Բացի այդ, փաստաբանները մտադիր են դիմել Սահմանադրական դատարան ՀՀ քրեական օրենսգրքի 300 և 300.1 հոդվածները` Մայր օրենքին համապատասխանությունը ստուգելու համար (հենց այս հոդվածների հիման վրա է Քոչարյանին մեղադրան առաջադրվել` Սահմանադրական կարգի տապալման փորձի համար. խմբգր.): Դեկտեմբերի 7–ի երեկոյան Քոչարյանը կալանավորվեց դատարանի որոշմամբ։
Քոչարյանի աջակիցները դատարանի որոշումը որակեցին քաղաքական վենդետտա և հայտարարեցին, որ դեկտեմբերի 11–ից սկսելու են բողոքի ամենօրյա ակցիաներ` նրան ազատ արձակելու պահանջով։
Բողոքի ակցիան մեկնարկեց Հանրապետության հրապարակում։ Այնուհետև աջակիցները երթով շարժվեցին դեպի Գլխավոր դատախազության շենք, որտեղ ներկայացրեցին իրենց պահանջները։
«Քոչարյանի կալանքի միջնորդությունը ներկայացրած դատախազը սկզբում պետք է պաշտպաներ պետության շահերը և պատասխանատվության ենթարկեր այն մարդկանց, ովքեր կապ ունեն գաղտնալսման հետ։ Հայաստանի գործող իշխանությունները, կոպտորեն խախտելով Սահմանադրությունն ու օրենքները, աննախադեպ ճնշում են գործադրում դատավորների վրա», – հայտարարեց ակցիայի համակարգող, «Հայ ազգային դաշինք» խմբի նախաձեռնող Արմեն Ծովակ Մինասյանը։
Նա նաև նշեց, որ ակցիայի մասնակիցները պահանջում են, որպեսզի իշխանությունները դադարեցնեն կոշտ ճնշումը դատական մարմինների վրա, այդ թվում` սահմանափակումը ԶԼՄ–ների նկատմամբ։
Նրա խոսքով, ակցիայի մասնակիցների ոչ մեծ թիվը կապված է այն բանի հետ, որ իշխանությունները ճնշում են գործադրում քաղաքացիների վրա և վախեցնում են նրանց։
Բողոքի ակցիան ավարտվեց Հանրապետության հրապարակում։ Մինասյանը հայտարարեց, որ հաջորդ ակցիայի վայրի և ժամանակի մասին կտեղեկացվի լրացուցիչ։
Դեկտեմբերի 9–ին ՀՀ վարչապետի պաշտոնակատար Նիկոլ Փաշինյանը, մեկնաբանելով բողոքի ակցիաներ կազմակերպելու մտադրությունը, հայտարարեց, որ «Հավաքների ազատության մասին» օրենքին համաձայն` յուրաքանչյուր ոք բողոքի ակցիաներ անցկացնելու իրավունք ունի, քանի որ Հայաստանը ժողովրդավարական պետություն է, և նման հանրահավաքները ևս կարող են անցկացվել։
Հայաստանի երկրորդ նախագահ Ռոբերտ Քոչարյանը մեղադրվում է նախնական պայմանավորվածությամբ մի խումբ անձանց հետ սահմանադրական կարգը տապալելու մեջ։
Երևանի ընդհանուր իրավասության դատարանը հուլիսի 28–ին որոշում է կայացրել 2 ամսով կալանավորել Հայաստանի երկրորդ նախագահ Ռոբերտ Քոչարյանին Մարտի 1–ի գործի շրջանակում։ Նա մեղադրվում է մի խումբ անձանց հետ նախնական պայմանավորվածությամբ սահմանադրական կարգը տապալելու համար։ Վերաքննիչ դատարանն օգոստոսի 13–ին բավարարեց Քոչարյանի փաստաբանների` կալանքի փաստը բողոքարկելու միջնորդությունը։ Միջնորդությունը բավարարվեց` հաշվի առնելով նախկին նախագահի անձեռնմխելիությունը։ Քոչարյանն ազատ արձակվեց դատարանի դահլիճից։
Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-
